Congress MP Rajani Patil : काँग्रेस अध्यक्षा सोनिया गांधींच्या (Sonia Gandhi) विश्वासू अशी ओळख असणाऱ्या राज्यसभा खासदार रजनी पाटील यांना सभापती जगदीप धनखड (Jagdeep Dhankhar) यांनी आज (शुक्रवार) निलंबित केलं.

सभागृहाच्या कामकाजाचं चित्रीकरण केल्याबद्दल सभापती धनखड यांनी काँग्रेस खासदार पाटील (Rajni Patil) यांना अर्थसंकल्पीय अधिवेशनाच्या उर्वरित कामकाजाकरिता निलंबित केलं. केंद्रीय मंत्री पियुष गोयल (Piyush Goyal) यांनी पाटील यांच्या या कृतीवर आक्षेप घेतला होता.

पंतप्रधानांच्या भाषणादरम्यान विरोधकांचा गोंधळ चित्रित केल्याप्रकरणी काँग्रेस खासदार रजनी पाटील यांच्यावर कारवाई करण्यात आली. आपण स्वातंत्र्य सैनिकांच्या घरातून आलो आहोत. सभागृहातला हा अपमान सहन करणार नाही, उर्वरित अधिवेशन काय, पूर्ण टर्म निलंबित करा हवं तर अशी प्रतिक्रिया रजनी पाटील यांनी कारवाईनंतर दिलीये.

राज्यसभेचे सभापती जगदीप धनखर म्हणाले, आज ट्विटरवर या सभागृहाच्या कार्यवाहीशी संबंधित व्हिडिओ प्रसारित करण्यात आला. मी त्याचा गांभीर्यानं विचार केला आणि आवश्यक ते सर्व केलं. तत्त्वानुसार आणि संसदेचे पावित्र्य राखण्यासाठी कोणत्याही बाहेरील एजन्सीचा सभागृहाच्या कामकाजात सहभाग मागता येणार नाही, त्यामुळं रजनी पाटील यांना निलंबित करण्यात येत आहे.