नवी दिल्ली : राजस्थानमध्ये आम्ही नेते एकत्रित काम करीत असून येत्या विधानसभा निवडणुकीत काँग्रेस पक्ष बहुमताने पुन्हा सत्तेत येईल, असा विश्वास काँग्रेस नेते राहुल गांधी यांनी आज व्यक्त केला.

येत्या २५ नोव्हेंबरला मतदान होणार असून या निवडणुकीच्या प्रचारासाठी काँग्रेस नेते राहुल गांधी यांचे सकाळी जयपूरला विमानाने आगमन झाले. ते चार दिवस राजस्थानमध्ये प्रचार करणार आहेत. काही दिवसांपूर्वी मुख्यमंत्री अशोक गहलोत व माजी उपमुख्यमंत्री सचिन पायलट यांच्यामध्ये मतभेद असल्याचे वृत्त पसरले होते. यामुळे राहुल गांधी यांनी राजस्थानच्या प्रचाराकडे दुर्लक्ष केल्याचा आरोप केला जात होता

परंतु मध्यप्रदेश व छत्तीसगडमधील प्रचार संपल्यानंतर लगेच दुसऱ्या दिवशी ते राजस्थानमध्ये दाखल झाले आहेत. जयपूर विमानतळावर स्वागतासाठी मुख्यमंत्री गेहलोत व सचिन पायलट उपस्थित होते. पत्रकारांच्या प्रश्नांना उत्तर देताना राहुल गांधी म्हणाले, आम्ही केवळ एकत्र दिसत नाही तर एकत्र आहोत. विधानसभा पूर्ण बहुमताने जिंकू, असा आशावाद त्यांनी व्यक्त केला.