नवी दिल्ली : देशाला लवकरच नवा राष्ट्रपती मिळणार आहे. 18 जुलै रोजी राष्ट्रपतीपदाची निवडणूक (Presidential Election) होणार असून, त्याबाबत राजकीय हालचाली सुरू आहेत. झारखंडच्या (Jharkhand) माजी राज्यपाल द्रौपदी मुर्मू (Draupadi Murmu) यांना एनडीएकडून (NDA) उमेदवार म्हणून घोषित करण्यात आलंय, तर विरोधकांकडून माजी अर्थमंत्री यशवंत सिन्हा (Yashwant Sinha) यांच्या नावाची घोषणा करण्यात आलीय.

दरम्यान, आता काँग्रेस नेते उदित राज (Congress leader Udit Raj) यांनी विद्यमान राष्ट्रपती रामनाथ कोविंद (President Ramnath Kovind) यांच्याबद्दल वादग्रस्त विधान केलंय. काँग्रेस नेते आणि माजी खासदार उदित राज यांनी प्रस्तावित राष्ट्रपती निवडणुकीदरम्यान वादग्रस्त ट्विट केलं असून, त्यानंतर ते सोशल मीडियावर ट्रोल होऊ लागले आहेत. काँग्रेस नेत्यानं विद्यमान राष्ट्रपती कोविंद यांच्यावर वादग्रस्त टिप्पणी करताना त्यांच्या ट्विटमध्ये लिहिलंय, 'जात पाहून आनंदी होऊ नका. कोविंदजी राष्ट्रपती झाले, तेव्हा दलित आनंदी होते, असं त्यांनी नमूद केलं.

त्यांचं हे वक्तव्य अशा वेळी आलंय, जेव्हा झारखंडच्या माजी राज्यपाल द्रौपदी मुर्मू, ज्या ओरिसाच्या आहेत आणि आदिवासी समाजाशी संबंधित आहेत. त्यांना एनडीएकडून उमेदवारी देण्यात आलीय. जर द्रौपदी मुर्मू राष्ट्रपतीपदाच्या निवडणुकीत विजयी झाल्या, तर आदिवासी समाजातून आलेल्या त्या देशाच्या पहिल्या राष्ट्रपती असतील. उदित राज यांनी असं वादग्रस्त विधान करण्याची ही पहिलीच वेळ नाहीय. अनेकदा ते वादग्रस्त वक्तव्य करत असतात. यापूर्वी त्यांनी पंतप्रधान नरेंद्र मोदी यांचं महान नाटककार म्हणून वर्णन केलं होतं.