नवी दिल्ली : देशात कोरोना विषाणूचा (Coronavirus) मोठ्या प्रमाणात फैलाव होऊ लागलाय. आज एकाच दिवसात कोरोना विषाणूचे 12 हजारांहून अधिक नवीन रुग्ण आढळून आले असून सक्रिय रुग्णांची संख्याही 65 हजारांच्या पुढं गेली आहे.

भारतात एका दिवसात कोरोना विषाणूच्या संसर्गाची 12,591 नवीन प्रकरणं समोर आल्यानंतर, देशात आतापर्यंत संक्रमित लोकांची संख्या 4.48 कोटी झाली आहे.

गेल्या आठ महिन्यांत नोंदवलेल्या दैनंदिन प्रकरणांची ही सर्वाधिक संख्या आहे. त्याच वेळी, देशात उपचार घेत असलेल्या रुग्णांची संख्या 65,286 वर पोहोचली आहे.

केंद्रीय आरोग्य मंत्रालयानं (Health Ministry) गुरुवारी जारी केलेल्या आकडेवारीनुसार, या संसर्गामुळं 45 रुग्णांचा मृत्यू झाला आहे. भारतात संसर्गाचा दैनंदिन दर 5.46 टक्के आहे, तर साप्ताहिक दर 5.32 टक्के आहे.

सध्या देशात 65,286 लोक कोरोना विषाणूच्या संसर्गावर उपचार घेत आहेत, जे एकूण प्रकरणांपैकी 0.15 टक्के आहे. भारतातील रुग्णांचा बरं होण्याचा राष्ट्रीय दर 98.67 टक्के आहे.

देशात आतापर्यंत एकूण 4,42,61,476 लोक संसर्गमुक्त झाले आहेत, तर कोविड-19 मुळं मृत्यूचं प्रमाण 1.18 टक्के आहे.