नवी दिल्ली : जगातील दुसऱ्या क्रमांकाची लोकसंख्या असलेल्या भारतात कोरोना महामारीचा (Coronavirus in India) प्रादुर्भाव पुन्हा वाढू लागलाय. गेल्या 24 तासांत इथं 18,819 नवीन कोरोना रुग्ण आढळले आहेत, तर 39 जणांचा मृत्यू झालाय. कालच्या तुलनेत आज अनेक टक्‍क्‍यांनी कोरोना रुग्णांत मोठी वाढ झालीय. तसेच, दैनंदिन कोविड सकारात्मकता दर 4.16% नोंदवला गेलाय.

सक्रिय रुग्णांची संख्या 1 लाखांच्या पुढं

आरोग्य मंत्रालयाकडून (Health Ministry) सांगण्यात आलंय की, आता देशभरात कोरोनाचे 1,04,555 सक्रिय रुग्ण आहेत. यासह देशातील एकूण कोरोना बाधितांची संख्या आता 4.35 कोटी झालीय. त्याच वेळी सरकारी आकडेवारीनुसार, देशात आतापर्यंत 52,5116 लोकांचा कोरोनामुळं मृत्यू झालाय. कालच बोलायचं झालं तर देशभरात 39 जणांचा मृत्यू झाला. यामुळं कोविड मृत्यू दर 1.21 टक्के झाला आहे.

आता दिवसेंदिवस नवीन कोरोना रुग्ण वाढत आहेत ही चिंतेची बाब आहे. देशभरात 1 लाखांहून अधिक सक्रिय रुग्ण आहेत. एकूण संसर्गाच्या 0.24 टक्के सक्रिय प्रकरणं झाली आहेत. सध्या देशात रिकव्हरी रेट 98.55 टक्के नोंदवला गेलाय. गेल्या 24 तासांत देशभरात एकूण 13827 रुग्ण बरे झाले आहेत. देशभरात आतापर्यंत एकूण 4 कोटी 28 लाख 22 हजार 493 लोकांनी या साथीवर मात केलीय. कोरोनापासून बचाव करण्यासाठी देशभरातील लोकांना 14,17,217 डोस देण्यात आले. यासह आतापर्यंत लसीचे एकूण 1,97,61,91,554 डोस देण्यात आले आहेत.