अरबी समुद्रात निर्माण झालेलं बिपरजॉय चक्रीवादळ गुजरातच्या दिशेनं सरकत आहे. बिपरजॉय चक्रीवादळाने रौद्र रुप धारण केलं असून हे वादळ आज गुजरातच्या किनारपट्टीवर धडकणार आहे. या पार्श्वभूमीवर गुजरात सरकारने योग्य ती खबरदारी घेतली आहे. किनारी भागातील लोकांना सुरक्षित स्थळी हलवण्याचे काम सुरु आहे. आत्तापर्यंत 74000 नागरिकांना सुरक्षित स्थळी हलवण्यात आल्याची माहिती प्रशासनाच्यावतीने देण्यात आली आहे. खबरदारी म्हणून NDRFची 33 पथके तैनात करण्यात आली आहेत.

तर गुजरातमधील कच्छ जिल्ह्यात बुधवारी ३.५ रिश्टर स्केल तीव्रतेचा भूकंप झाला आहे. अरबी समुद्रात सध्या बिपरजॉय चक्रीवादळ घोंघावत असताना हे चक्रीवादळ गुरुवारी कच्छच्या किनारपट्टीवर धडकण्याची शक्यता आहे. अशी स्थिती असताना चक्रीवादळ गुजरात किनारपट्टीवर धडकण्याआधी कच्छ जिल्ह्यात अनेक ठिकाणी भूकंपाचे धक्के जाणवले आहेत. त्यामुळे भीतीचं वातावरण निर्माण झालं आहे.

गांधीनगरमधील भूकंपशास्त्र संशोधन संस्थाने दिलेल्या माहितीनुसार, या भूकंपाचा केंद्रबिंदू कच्छ जिल्ह्यातील बछाऊपासून पश्चिम-नैऋत्य दिशेला ५ किलोमीटर अंतरावर होता. काल संध्याकाळी ५ वाजून ५ मिनिटांनी भूकंपाचे धक्के बसले आहेत. यामध्ये सुदैवाने जीवितहानी झाल्याची अद्याप कोणतीही माहिती समोर आली नाही. याबाबतचं वृत्त ‘इंडिया टुडे’ने दिले आहे.

तीव्र झालेल्या बिपरजॉय चक्रीवादळाच्या पार्श्वभूमीवर गुजरातमधील सौराष्ट्र, द्वारका आणि कच्छ किनारपट्टीसाठी ‘रेड अलर्ट’ जारी केला आहे. चक्रीवादळामुळे मोठ्या प्रमाणावर नुकसान होण्याची शक्यता आहे. तसेच अनेक राज्यांमध्ये अतिवृष्टीचा इशारा देण्यात आला आहे. गुजरातमधील आठ जिल्ह्यांतील समुद्राजवळ राहणाऱ्या लोकांना सुरक्षित ठिकाणी हलवण्यात आलं आहे.गुजरातमध्ये आपत्ती व्यवस्थापन आणि बचावकार्य करण्यासाठी एनडीआरएफची अठरा पथकं तैनात केली आहेत.