दिल्ली : भारतीय हवाई दलाने (IAF) प्रायोगिक तत्त्वावर महिला वैमानिक स्वीकारण्यास सुरुवात केल्यानंतर सहा वर्षांनंतर संरक्षण मंत्रालयाने (MoD) त्याचे कायमस्वरूपी योजनेत रूपांतर करण्याचा निर्णय घेतला आहे, अशी घोषणा संरक्षण मंत्री राजनाथ सिंह (Rajnath Singh) यांनी मंगळवारी केली.

त्यांनी ट्विट करत माहिती दिली की, “MoD ने भारतीय हवाई दलात महिला लढाऊ वैमानिकांच्या समावेशासाठी प्रायोगिक योजनेचे कायमस्वरूपी योजनेत रूपांतर करण्याचा निर्णय घेतला आहे. ही भारताच्या 'नारी शक्ती'च्या क्षमतेचे आणि आपले पंतप्रधान श्री @narendramodi यांच्या महिला सक्षमीकरणाप्रती असलेल्या वचनबद्धतेची साक्ष आहे. असे त्यांनी ट्विटमध्ये लिहीले आहे.

आत्तापर्यंत 16 महिला फायटर पायलट यांना IAF मध्ये नियुक्त करण्यात आले आहे. याला कायमस्वरूपी योजना बनवण्यास आता MoD ने मंजुरी दिली आहे. संरक्षण मंत्रालयाने 2015 मध्ये महिलांना हवाई दलात फायटर पायलट म्हणून सामील होण्यास परवानगी दिली होती, परंतु “Induction of Women SSC officers in Fighter Stream of Flying Branch” ची योजना 2016 मध्ये सुरू झाली.

गेल्या वर्षी सशस्त्र दलात महिलांना सामील होण्यासाठी मोठी चालना मिळाली आहे, कारण सर्वोच्च न्यायालयाच्या हस्तक्षेपानंतर, महिलांना राष्ट्रीय संरक्षण अकादमी(NDA) मध्ये सामील होण्याची परवानगी देण्यात आली आहे, ज्यामुळे महिला अधिकाऱ्यांना तिन्ही दलांमध्ये सहभागी होण्याची संधी उपलब्ध झाली. नोव्हेंबरमध्ये एनडीएच्या प्रवेश परीक्षेला बसलेल्या उमेदवारांपैकी जवळपास एक तृतीयांश महिला होत्या.

वर्षभरापूर्वी, तत्कालीन संरक्षण राज्यमंत्री श्रीपाद नाईक यांनी 8 फेब्रुवारी 2021 रोजी राज्यसभेत सांगितले होते की, लष्करात 12,18,036 पुरुषांमागे 6,807 महिला आहेत. त्याचप्रमाणे हवाई दलात पुरुष आणि महिलांचे प्रमाण 1,46,727 to 1,607 इतके होते. नौदलात 10,108 पुरुषांमागे फक्त 704 महिला होत्या.