दिल्लीस्थित ऑल इंडिया इन्स्टिट्यूट ऑफ मेडिकल सायन्सेस (एम्स) आता सोमवारीही सुरू राहणार आहे. अयोध्येतील राम मंदिरातील रामलल्लाच्या प्राणप्रतिष्ठा सोहळ्याच्या प्रसंगी सोमवार, 22 जानेवारी रोजी अर्धा दिवस ओपीडी बंद ठेवण्याचा निर्णय एम्स प्रशासनाने मागे घेतला आहे. आता रुग्णांची गैरसोय होऊ नये म्हणून दिवसभर ओपीडी सुरू राहणार आहे. एम्सचे प्रशासकीय अधिकारी राजेश कुमार यांनी रविवारी या संदर्भात जारी केलेल्या नवीन कार्यालयाच्या मेमोमध्ये ही माहिती देण्यात आली आहे.

मिळालेल्या माहितीनुसार, याआधी शनिवारी अयोध्येतील राम मंदिर प्राणप्रतिष्ठा सोहळ्याच्या निमित्ताने दिल्लीतील एम्स आणि दिल्लीतील सफदरजंग रुग्णालयासह केंद्र सरकारद्वारे चालवली जाणारी चारही रुग्णालये 22 जानेवारीला दुपारी 2.30 वाजेपर्यंत बंद राहतील, असे सांगण्यात आले होते. . मात्र, या काळात आपत्कालीन सेवा सुरू राहणार होती.

वृत्तसंस्थाच्या वृत्तानुसार, राजधानी दिल्लीतील एम्सच्या अधिकृत सूचनेनुसार, केंद्र सरकारने 22 जानेवारी रोजी दुपारी 2.30 वाजेपर्यंत अर्ध्या दिवसाची सुट्टी जाहीर केली होती. त्यात म्हटले आहे की, “सर्व कर्मचाऱ्यांच्या माहितीसाठी कळविण्यात येते की, 22 जानेवारी रोजी दुपारी 2:30 वाजेपर्यंत संस्था अर्धा दिवस बंद राहणार आहे. सर्व विभाग प्रमुखांना आणि अधिकाऱ्यांना विनंती आहे की त्यांनी त्यांच्या अंतर्गत काम करणाऱ्या सर्व कर्मचाऱ्यांच्या निदर्शनास ही बाब आणून द्यावी.'' त्यात पुढे ''...सर्व आपत्कालीन वैद्यकीय सेवा चालू राहतील.'' असे म्हटले होते.

एम्सच्या अधिकाऱ्याने सांगितले होते की, रुग्णांना दिलेला वेळ पुन्हा शेड्यूल केला जात आहे. जर कोणी रुग्ण आला तर आम्ही त्यावर उपचार करू. मात्र, सायंकाळची ओपीडी सुरू राहणार आहे.