Delhi Building Fire: दिल्लीतील भीषण आगीची घटना घडली आहे. दिल्लीतील शहादरा परिसरातील शास्त्रीनगर भागात असलेल्या एका ४ मजली इमारतीला आज (ता. १४) पहाटेच्या सुमारास अचानक भाषण आग लागली. बघता-बघता आगीने रौद्ररूप धारण केले. आग लागल्याचे समजताच इमारतीतील रहिवासी जीव मुठीत घेऊन घराबाहेर पडले. मात्र, या आगीत पती-पत्नीसह दोन चिमुकल्यांचा होरपळून मृत्यू झाला.

मिळालेल्या माहितीनुसार, गुरुवारी पहाटे ५.२२ वाजताच्या सुमारास गीता कॉलनीतील शास्त्रीनगर, सरोजिनी पार्क गल्ली क्रमांक १३ येथील घर क्रमांक ६५ मध्ये भीषण आग लागल्याची माहिती मिळाली. यानंतर स्थानिक पोलीस 4 फायर इंजिन, रुग्णवाहिका आणि 3 पीसीआर व्हॅनसह घटनास्थळी पोहोचले. इमारतीत अडकलेल्या दोन मुलांसह नऊ जणांना पोलीस आणि अग्निशमन दलाच्या जवानांनी बाहेर काढले आणि जवळच्या हेडगेवार रुग्णालयात दाखल केले. उपचारादरम्यान पती-पत्नीसह दोन चिमुकल्यांचा मृत्यू झाला.

ज्या इमारतीत आग लागली ती चार मजली असून तळमजल्यावर कार पार्किंग असल्याचे पोलिसांनी सांगितले. पार्किंगमधून आग लागली आणि संपूर्ण इमारतीत धूर पसरला. रस्ता अरुंद असूनही अग्निशमन दलाच्या अधिकाऱ्यांना घटनास्थळी पोहोचून आगीवर नियंत्रण मिळवण्यात यश आले. सर्व मजले शोधण्यात आले. तेथून तीन पुरुष, चार महिला आणि दोन मुलांना बाहेर काढून हेडगेवार रुग्णालयात उपचारांसाठी दाखल करण्यात आले.

मृतांमध्ये मनोज (30), त्याची पत्नी सुमन (28) आणि पाच आणि तीन वर्षांच्या दोन मुलींचा समावेश आहे. राकेश असे मुलीच्या वडिलांचे नाव आहे.

एका वरिष्ठ पोलीस अधिकाऱ्याने सांगितले की, "आम्हाला पहाटे 5:20 वाजता गीता कॉलनीजवळील शास्त्री नगरमधील एका निवासी इमारतीत भीषण आग लागल्याची माहिती मिळाली. आम्ही तातडीने दिल्ली अग्निशमन सेवेला कळवले. घटनास्थळी पोलिसांचे पथक, 4 अग्निशमन दलाच्या गाड्या, रुग्णवाहिका आणि पीसीआर व्हॅन पाठवण्यात आली".