Delhi Car Accident News: भरधाव वेगात असणारी कार अनियंत्रित झाल्याने थेट आठवडे बाजारात घुसली. काही क्षणातच कारने १० ते १२ जणांना जोरदार धडक दिली. या घटनेत एका महिलेचा जागीच मृत्यू झाला असून ७ ते ८ जण जखमी झाले आहेत. जखमींना उपचारासाठी रुग्णालयात दाखल करण्यात आले आहे. अंगाचा थरकाप उडवणारी ही घटना दिल्लीतील गाझीपूर भागात बुधवारी (ता. १३) रात्री साडेनऊ वाजेच्या सुमारास घडली. अपघातानंतर बाजारपेठेत उपस्थित नागरिक संतप्त झाले आणि त्यांनी वाहनाची तोडफोड केली.

या संपूर्ण घटनेचे सीसीटीव्ही फुटेजही समोर आले आहे. एका सिल्व्हर रंगाची भरधाव कार अनियंत्रित झाली आणि रस्त्याने खरेदी करणाऱ्या लोकांना कारने चिरडले हे स्पष्ट दिसत आहे. अपघातानंतर कार चालकाने घटनास्थळावरून पळून जाण्याचाही प्रयत्न केला. मात्र, नंतर लोकांनी त्याला पकडून पोलिसांच्या ताब्यात दिले.

पोलिसांनी दिलेल्या माहितीनुसार, ही घटना रात्री साडेनऊ वाजता घडली. या अपघातात एका 22 वर्षीय महिलेचा मृत्यू झाला. सीता देवी असे मृत महिलेचे नाव आहे. याशिवाय या अपघातात ७ जण जखमी झाले असून त्यात ५ महिला आणि २ पुरुषांचा समावेश आहे. कारमध्ये प्रवास करणारे आरोपीही जखमी झाले. त्याच्यावरही उपचार सुरू आहेत. पोलिसांनी या प्रकरणाचा तपास करून पुढील कारवाई सुरू केली आहे.

अपघातानंतर घटनेस्थळी मोठा गोंधळ उडाला. यावेळी त्यांनी कार चालकाला पकडून कारची काच फोडली. यानंतर संतप्त लोकांनी त्याची कार पलटवली. माहिती मिळताच पोलिसांनी घटनास्थळ गाठून आरोपीला ताब्यात घेतले. आरोपीला प्रथम रुग्णालयात उपचारासाठी नेण्यात आले व नंतर पोलीस ठाण्यात नेऊन पुढील कारवाई सुरू करण्यात आली.

दरम्यान, अपघाताची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली. सध्या अपघातातील जखमींवर रुग्णालयात उपचार सुरू आहे. या थरारक घटनेचा व्हिडीओ सोशल मीडियावर व्हायरल होत आहे.