दिल्ली पोलिसांनी आंतरराष्ट्रीय ड्रग कार्टेलचा (Narcotic drug cartel) पर्दाफाश केला असून त्यातील दोन मुख्य आरोपींना 40 कोटी रुपयांच्या हेरॉईनसह रंगेहाथ अटक केली आहे. दिनेश सिंग आणि नजीर उर्फ नाझीम अशी आरोपींची नावे आहेत.

मणिपूर, आसाम, उत्तर प्रदेश, बिहार आणि दिल्ली या राज्यांमध्ये आंतरराष्ट्रीय अंमली पदार्थांचे तस्करी होत असल्याची प्राथमिक माहिती समोर आली होती. या संदर्भात स्पेशल सेलचे एक पथक काम करत होते. या दरम्यान आरोपी म्यानमारमधून तस्करी केलेले हेरॉईन देशाच्या विविध भागांमध्ये पुरवठा करत असल्याचे स्पेशल सेलला आढळले. ही माहिती गोळा करण्याकरीता स्पेशल सेल ला तब्बल चार महिने लागले आणि या तपासादरम्याम या आरोपींची ओळख पटली.

24 मार्च रोजी पोलिसांना माहिती मिळाली की आरोपी दिनेश आणि नझीर झारखंडमधून हेरॉईनची एक मोठी तस्करी करत आहे. आणि त्यांच्या ओळखीच्या एकाला दारूचा पुरवठा करण्यासाठी दिल्लीत येणार आहेत. यावरुन दिल्ली पोलिसांनी दिल्ली-मेरठ एक्सप्रेसवेवर सापळा रचला आणि दोन्ही आरोपींना रंगेहाथ पकडले.

दोन्ही आरोपींच्या बॅगमधून सहा किलो हेरॉईन जप्त करण्यात आले. कारची झडती घेतली असता, कारच्या मागील बाजूच्या सीटच्या खालच्या बाजूला तयार केलेल्या पोकळीत आणखी चार किलो हेरॉईन लपवून ठेवलेले आढळून आले. असे एकूण १० किलो हेरॉईन जप्त करण्यात आले.