Hawala Operator Mohammad Yasin : दिल्ली पोलिसांच्या (Delhi Police) विशेष पथकानं जम्मू कश्मीर पोलिसांसोबत (Jammu Kashmir Police) केलेल्या संयुक्त कारवाईत एका हवाला एजंटला (Hawala Operator) अटक केलीय. दिल्लीतील तुर्कमान गेट येथून या एजंटला अटक करण्यात आलीय. मोहम्मद यासीन असं या एजंटचं नाव आहे.

दहशतवाद्याला पुरवले 10 लाख

यासीन हा लष्कर ए तोयबा (Lashkar e Taiba) आणि अल बद्र सारख्या (LeT and Al Badr) दहशतवादी संघटनांना पैसे पुरवण्याचं काम करत होता. यासीनं कश्मीरमधील एका दहशतवाद्याला 10 लाख रुपये पुरवले होते, ते पैसे नंतर दहशतवादी कारवायांसाठी वापरले गेल्याची माहिती उघड झालीय. दिल्ली पोलिसांना गुप्तचर यंत्रणेकडून मीना बाजार परिसरात एक हवाला एजंट काम करत असल्याची माहिती मिळाली होती. या माहितीच्या आधारे एका विशेष पथकाची स्थापना करून शोधमोहीम राबवण्यात आली होती.

यासीनला हवालाच्या माध्यमातून मिळाले 24 लाख

आज शुक्रवारी दिल्लीतील तुर्कमान गेट परिसरातून यासीनला अटक करण्यात आली. यासीनच्या चौकशीत काही महत्त्वपूर्ण माहिती मिळालीय. यासीन हा वास्तविक एक कपडा व्यापारी आहे. तो मीना बाजार परिसरातून काम करतो. पण, कापड व्यवसाय हा लोकांना दाखवण्यासाठी असून तो परदेशाहून येणारा पैसा जम्मू कश्मीरला पाठवण्याचं काम करत होता. तो एका मोठ्या हवाला रॅकेटचा एक भाग आहे. काही दिवसांपूर्वीच यासीनला हवालाच्या माध्यमातून 24 लाख मिळाले होते. त्यातील 17 लाख रुपये त्यांने जम्मू-कश्मीरला पाठवले. याआधी त्यानं 10 लाख रुपये अब्दुल हामिद नावाच्या दहशतवाद्याला पाठवले होते.