नवी दिल्ली - बिहारमध्ये स्वातंत्र्यदिनाच्या सोहळ्यादरम्यान मुख्यमंत्री नितीश कुमार यांच्या सुरक्षेतील हलगर्जीपणाचे मोठे प्रकरण समोर आले आहे. बिहारचे मुख्यमंत्री नितीश कुमार गांधी मैदानावर स्वातंत्र्यदिनी संबोधित करत होते, त्यादरम्यान एक युवक व्यासपीठाजवळ घुसला आणि मुख्यमंत्री नितीश कुमार यांच्याविरोधात निदर्शने करत घोषणाबाजी करू लागला.

तेथे तैनात असलेल्या सुरक्षा रक्षकांनी त्याला पकडले. यावेळी तरुणाने घोषणाबाजी केली. मुख्यमंत्र्यांच्या सुरक्षेतील हलगर्जीपणामुळे पोलीस यंत्रणेवर प्रश्नचिन्ह निर्माण झाले आहेत. पटनाचे जिल्हा दंडाधिकारी डॉ. चंद्रशेखर यांनी घटनेबाबत सांगितले की, तो मुंगेरचा रहिवासी आहे. नितीश कुमार असे या तरुणाचे नाव असून त्याच्या हातात पदक होते. राजेश्वर मंडल असे तरुणाच्या वडिलांचे नाव आहे.

युवकाच्या वडिलाचे 1996च्या निवडणुकीदरम्यान कर्तव्यावर असताना निधन झाले होते. ते बीएमपीचे शिपाई होते. त्यांच्या मृत्यूनंतर अनुकंपा तत्त्वावर नोकरीबाब या तरुणाने मुख्यमंत्र्यांसमोर निदर्शने केली. या घटनेची माहिती बिहार पोलिस मुख्यालयाला देण्यात आली आहे. तसेच घटनेचा तपास करण्यात येत आहे. युवक व्हीआयपींच्या रांगेत कसा पोहोचला, याची देखील चौकशी करण्यात येत आहे.