नवी दिल्ली : पंतप्रधान नरेंद्र मोदी यांनी २०१४ मध्ये देशाची सूत्रे हातात घेतल्यानंतर देशाच्या विकासाचा वेग वाढल्याचा दावा भाजपचे राष्ट्रीय अध्यक्ष जे. पी. नड्डा यांनी पत्रकारांशी बोलताना केला. मोदी सरकारला नऊ वर्षे पूर्ण होत असल्याबद्दल नड्डा यांनी पत्रकारांशी अनौपचारिक संवाद साधला.

यावेळी बोलताना त्यांनी डॉ. मनमोहन सिंग आणि नरेंद्र मोदी यांच्या कार्यकाळाची तुलना केली. डॉ. सिंग यांच्या काळात देशाची स्थिती चांगली नव्हती. एवढेच नव्हे तर भ्रष्टाचार करणारा देश अशी प्रतिमा या काळात निर्माण झाली होती. परंतु नरेंद्र मोदी यांनी देशाची सूत्रे स्वीकारल्यानंतर देशाची जगातील प्रतिमा सुधारली असून जगात भारत एक शक्तीशाली देश व जागतिक राजकारणावर प्रभाव टाकणारा देश म्हणून ओळख निर्माण झाल्याचा दावा त्यांनी यावेळी केला.

सर्व समाजाची प्रगती

पंतप्रधान मोदी यांच्या काळात केंद्रीय मंत्रिमंडळात अनुसूचित जाती, अनुसूचित जमाती व ओबीसी समाजातील मंत्र्यांची संख्या वाढली आहे. उच्च शिक्षणामध्ये आर्थिकदृष्ट्या दुर्बल घटकांना १० टक्के आरक्षण देण्याचा निर्णय घेतला आहे. मागासवर्गीयांच्या विकासासाठी राष्ट्रीय मागासवर्ग आयोगाची स्थापना केली आहे.

भटक्या विमुक्त जमातींच्या विकासासाठी राष्ट्रीय आयोगाची स्थापना केली आहे. महिलांच्या हक्कासाठी विविध योजना केंद्र सरकारने सुरू केल्या आहेत. समाजातील प्रत्येक घटकासाठी मोदी सरकारने योजना करून सर्व समाजातील मुख्य प्रवाहात आणण्याचे काम केल्याचा दावा नड्डा यांनी केला.