नागपूर : ‘पंतप्रधान नरेंद्र मोदी यांच्यावर कामावर विश्वास ठेवून जो कोणी भाजपमध्ये येईल, त्यांचे स्वागत असेल,’ असे म्हणत उपमुख्यमंत्री देवेंद्र फडणवीस यांनी सोमवारी ज्येष्ठ नेते एकनाथ खडसे यांच्या संभाव्य भाजप प्रवेशाबाबत प्रतिक्रिया व्यक्त केली. महाराष्ट्र नवनिर्माण सेनेचे प्रमुख राज ठाकरे हेसुद्धा महायुतीला साथ देतील, असा विश्‍वास फडणवीस यांनी व्यक्त केला.

महायुतीतील समावेशाबाबत ‘मनसे’बरोबर काही दिवसांपूर्वी चर्चा झाली असल्याचे देवेंद्र फडणवीस पत्रकारांशी बोलताना म्हणाले. ‘‘मनसेने जेव्हापासून हिंदुत्वाचा अजेंडा घेतला, तेव्हापासून त्यांच्याशी जवळीक वाढलेली आहे. राज ठाकरे असे पहिले व्यक्ती आहे की ज्यांनी मोदी पंतप्रधान झाले पाहिजे अशी जाहीर भूमिका घेतली होती. मधल्या काळात त्यांची भूमिका बदलली होती. मात्र, मागील दहा वर्षांत ज्या पद्धतीने नवीन भारताची निर्मिती झाली आहे, ते राज यांनाही मान्य असेल. जे लोक राष्ट्रीय विचाराने प्रेरित आहेत, अशा लोकांनी मोदीजीसोबत राहिले पाहिजे. राज ठाकरे यांचा पक्ष महायुती सोबत राहील असा विश्वास आहे,’’ असे फडणवीस म्हणाले.

भाजप सोडून राष्ट्रवादी काँग्रेसमध्ये गेलेल्या एकनाथ खडसे यांची भाजपमध्ये परतण्याची इच्छा आहे. त्याबाबत फडणवीस यांना विचारले असता ते म्हणाले, ‘‘खडसे यांनी अजून अधिकृतरीत्या कळविलेले नाही. मात्र ज्यावेळेस इकडे येतील त्यांचे आम्ही स्वागतच करू. मोदी यांच्या नेतृत्वावर विश्वास ठेवून कोणीही भाजपत प्रवेश करीत असेल त्याचे स्वागतच असेल.’’ पंतप्रधान नरेंद्र मोदी यांच्या सभांमुळे महायुतीच्या उमेदवारांच्या मतांमध्ये अधिक वाढ होईल, असेही फडणवीस म्हणाले.

बारामतीतून सुनेत्रा पवार निवडून आल्या तर त्या पंतप्रधान मोदी यांच्याकरिता हात उंच करतील. सुप्रिया सुळे निवडून आल्या तर त्या राहुल गांधींसाठी हात वर करतील. आता काही लोकांना समजून घ्यायचे नाही, त्याला मी काहीच करू शकत नाही.

- देवेंद्र फडणवीस, उपमुख्यमंत्री