Plane Crashed in Afghanistan Not Indian : अफगाणिस्तानमध्ये भारताचं एक विमान क्रॅश झाल्याची माहिती तेथील स्थानिक माध्यमांनी दिली होती. मात्र, आता भारत सरकारने हे विमान भारतीय नसल्याचं स्पष्ट केलं आहे. DGCA ने याबाबत अधिकृत माहिती दिली आहे.

"अफगाणिस्तानमध्ये झालेली ही घटना दुर्दैवी आहे. मात्र हे विमान भारतीय नाही. हे इंडियन शेड्यूल्ड एअरक्राफ्ट किंवा भारतीय चार्टर्ड विमानही नाही. हे मोरक्को-रजिस्टर्ड लहान विमान आहे." अशी माहिती DGCAने दिली.

'ते' विमान रशियाचं?

दरम्यान, रशियाच्या अधिकाऱ्यांनी दिलेल्या माहितीनुसार एक रशियन विमान हे शनिवारी रात्री अफगाणिस्तान जवळ असताना रडारवरुन गायब झालं. या विमानामध्ये सहा प्रवासी होते. हे विमान डसॉल्ट फाल्कन 10 जेट होतं. हे चार्टर्ड प्लेन भारतातून मॉस्कोकडे प्रवास करत होतं. उझबेकिस्तान मार्गे हे विमान प्रवास करत होतं.

अफगाणिस्तानमधील स्थानिक माध्यमांनी माहिती मंत्रालयाच्या हवाल्याने म्हटलं होतं, की भारतातून मॉस्कोकडे जाणारं एक विमान अफगाणिस्तानच्या बदख्शां प्रांतामध्ये कोसळलं आहे. हे विमान भारतीय असल्याचा दावा तालिबानने केला होता. मात्र, आता भारत सरकारने याबाबत स्पष्टीकरण दिलं आहे.