मुंबई - मुंबईत विरोधकांनी स्थापन केलेल्या इंडिया आघाडीची दोन दिवसीय बैठक नुकतीच पार पडली आहे. मात्र या बैठकीत इंडिया आघाडीच्या संयोजक पदावरून मतभेद निर्माण झाल्याचं सांगण्यात येत आहे. सत्ताधारी पक्षाकडून देखील हाच धागा पकडून टीका करण्यात येत आहे.

इंडिया आघाडीच्या बैठकीनंतर आयोजित करण्यात आलेल्या पत्रकार परिषदेसाठी ममता बॅनर्जी गैरहजर होत्या. त्यामुळे नाराजीच्या चर्चा सुरू झाल्या होत्या. संयोजकपद काँग्रेस सोडून दुसऱ्या पक्षाला द्यावं असं ममता बॅनर्जी, एम. के. स्टॅलिन आणि नितीश कुमार यांचं मत आहे. मात्र काँग्रेस संयोजक म्हणून मल्लिकार्जुन खरगे यांच्या नावावर ठाम आहे.

ममता बॅनर्जी या बैठकीनंतर नाराज होऊन पत्रकार परिषदेला उपस्थित न राहता निघून गेल्या. शिवाय आघाडीचं काम धिम्या गतीने जात असल्याचं देखील ममता बॅनर्जी यांनी बैठकीत बोलून दाखवल्याचं समजतं.

आम्ही नाराज आहोत. अशा पद्धतीच्या बैठका घेवून काहीही होणार नाही. लढण्याची तयारी दिसत नाही, असं सांगत, ममता बॅनर्जी निघून गेल्या. तसेच त्यांनी अभिषेक बॅनर्जी यांना देखील थांबू दिलं नसल्याचं सांगण्यात येत आहे.