नवी दिल्ली - दिल्लीचे मुख्यमंत्री अरविंद केजरीवाल यांना कथित मद्यधोरण गैरव्यवहार प्रकरणातील चौकशीसाठी आज सक्तवसुली संचालनालयाने (ईडीने) सलग चौथ्यांदा नोटीस बजावली आहे. त्यांना येत्या १८ जानेवारीला ‘ईडी’ कार्यालयात हजर राहण्याचे निर्देश देण्यात आले आहेत.

गेल्या नोव्हेंबर महिन्यापासून केजरीवाल यांना आज मिळालेली ही चौथी नोटीस आहे. पहिल्यांदा निवडणूक प्रचारामुळे, त्यानंतर विपश्यना शिबिराला जाणार असल्याचे कारण देत त्यांनी ‘ईडी’च्या कार्यालयात जाणे टाळले होते. मुख्यमंत्री केजरीवाल यांनी ही नोटीस बेकायदा व राजकीय भावनेतून पाठविण्यात आल्याचे म्हटले आहे. या नोटिशीमध्ये आरोपी म्हणून की साक्षीदार म्हणून विचारणा होणार याचाच उल्लेख नसल्याचे केजरीवाल यांनी म्हटले होते.

‘ईडी’ने लेखी प्रश्न पाठवावे त्याचे उत्तर दिले जाईल, असेही त्यांनी तपाससंस्थेला पाठविलेल्या पत्रात नमूद केले आहे. केजरीवाल यांच्या या पत्राला ‘ईडी’ने अद्याप उत्तर दिलेले नाही. यामुळे येत्या १८ जानेवारीला मुख्यमंत्री केजरीवाल ‘ईडी’च्या कार्यालयात जाणार की पुन्हा गैरहजर राहणार हे अद्याप स्पष्ट झालेले नाही.

केजरीवालांचा गोवा दौरा

येत्या १९ जानेवारीपासून मुख्यमंत्री केजरीवाल यांच्या दोन दिवसांच्या गोवा दौऱ्याला सुरूवात होणार आहे. या दौऱ्यादरम्यान ते पक्षाचे कार्यकर्ते आणि पदाधिकाऱ्यांशी संवाद साधतील. राज्यातील पक्ष संघटनेचाही ते आढावा घेतील, अशी माहिती सूत्रांकडून देण्यात आली.

केंद्र सरकार केजरीवालांना रोखण्यासाठी ‘ईडी’चा गैरवापर करत आहे, स्वतः ‘ईडी’च्या अधिकाऱ्यांनी सरकारच्या हातातील शस्त्र बनणे टाळावे. समन्स केजरीवालांपर्यंत पोचण्याआधीच ते माध्यमांच्या हाती कसे काय लागले?

- गोपाल राय, ‘आप’चे नेते आणि मंत्री