नवी दिल्ली: कोरोना प्रतिबंधक लसीबद्दल (Vaccination) पसरवल्या जाणाऱ्या अफवा (Rumours) दूर करण्यासाठी स्थानिक पातळीवर धर्मगुरुंना (Religious leaders) सहभागी करुन घ्या, असे निर्देश पंतप्रधान नरेंद्र मोदी (Narendra modi) यांनी आज जिल्हा दंडाधिकाऱ्यांना दिले. कोरोना प्रतिबंधक लसीकरणाचे प्रमाण कमी असलेल्या जिल्ह्यांच्या दंडाधिकाऱ्यांसोबत पंतप्रधान नरेंद्र मोदी यांनी आज आढावा बैठक घेतली. ४० पेक्षा जास्त जिल्ह्यांचे दंडाधिकारी या बैठकीत सहभागी झाले होते.

लसीच्या पहिल्या डोसप्रमाणे दुसऱ्या डोसलाही तितकचं गांभीर्याने घेण्याची विनंती मोदींनी देशातील जनतेला केली. लसीचे १ अब्ज डोस झाल्यानंतर देशात शिथिलता आली, तर दुसरं संकट निर्माण होऊ शकतात, असं मोदी म्हणाले.

"आजार आणि शत्रूला कधीही कमी लेखू नका. त्यांच्याशी शेवटपर्यंत लढावं लागतं. म्हणून, माझी इच्छा आहे की आपण थोडासाही हलगर्जीपणा करू नये" असे ते म्हणाले. "तुमच्या मेहनतीमुळे आजपर्यंत इथवर प्रगती करणं शक्य झालं आहे. आशा कर्मचाऱ्यांनी भरपूर काम केलं आहे. अनेक मैल अंतर चालून, दुर्गम भागापर्यंत लसीकरण पोहोचवलं. आपण लसीचे १ अब्ज डोस झाल्यानंतर शिथिल झालो, तर नवीन समस्या निर्माण होऊ शकतात" असे मोदी म्हणाले.