नवी दिल्ली / चंडीगड - दिल्ली सीमेवरील शेतकरी आंदोलनाची धग वाढत चालली असून खानौरी सीमेवरील चकमकीमध्ये एका शेतकऱ्याचा मृत्यू झाल्यानंतर शेतकरी संघटना आक्रमक झाल्या. या घटनेच्या निषेधार्थ आज (ता.२३) देशभर काळा दिवस पाळण्यात येणार असून १४ मार्चला रामलीला मैदानावर आंदोलन करण्यात येणार असल्याची घोषणा किसान मोर्चाकडून आज करण्यात आली आहे.

शेतकऱ्याच्या मृत्यूनंतर शेतकरी संघटनांनी ‘दिल्ली चलो’ आंदोलनास तूर्त ब्रेक लावला आहे. ‘ शेतकऱ्याच्या मृत्यूप्रकरणी खुनाचा गुन्हा दाखल करण्यात यावा,’ अशी मागणी शेतकरी नेते सरवनसिंग पंधेर यांनी केली आहे. शेतकऱ्यांचे २५ ते ३० ट्रॅक्टर आणि ट्रॉली यांचे नुकसान केल्याप्रकरणी निमलष्करी दलाच्या कर्मचाऱ्यांविरोधात कारवाई करण्यात यावी, अशी मागणी पंधेर यांनी केली.

दरम्यान पंजाब- हरियानाच्या खानौरी सीमेवर शेतकरी आंदोलक आणि पोलिस यांच्यात झालेल्या चकमकीमध्ये एका शेतकऱ्याचा मृत्यू झाला होता तर बारा पोलिस कर्मचारी जखमी झाले आहेत. शुभकरन सिंग (वय २१) असे मरण पावलेल्या युवा शेतकऱ्याचे नाव असून तो भटिंडा जिल्ह्यातील रहिवासी आहे.

पतियाळामध्ये पंधेर म्हणाले की, ‘हरियाना सुरक्षा दलाचे कर्मचारी हे पंजाबच्या हद्दीमध्ये प्रवेश करत असून खानौरी सीमेवर त्यांच्याकडून दडपशाही सुरू आहे. शेतकऱ्याच्या मृत्यूप्रकरणी पंजाब सरकारने खुनाचा गुन्हा दाखल करावा, अशी आमची मागणी आहे.’

पोलिसांवरही कारवाई होणार

‘शुभकरनसिंगला हुतात्म्याचा दर्जा बहाल करण्यात यावा,’ अशी मागणी शेतकरी नेते जगजितसिंग डल्लेवाल यांनी केली आहे. या युवा शेतकऱ्याच्या निधनावर पंजाबचे मुख्यमंत्री भगवंत मान यांनी शोक व्यक्त केला आहे. शवविच्छेदन पार पडल्यानंतर याप्रकरणी गुन्हा दाखल करण्यात येईल. या शेतकऱ्याच्या मृत्यूसाठी कारणीभूत ठरलेल्या पोलिस अधिकाऱ्यांवरही कठोर कारवाई केली जाईल, असे मान यांनी स्पष्ट केले.