बेळगाव : तुटून पडलेल्या वीज तारेला (Electric Wire) स्पर्श झाल्याने बापलेक ठार झाले. काल सकाळी ८.३० च्या सुमारास उडकेरी (ता. बैलहोंगल) येथे घटना घडली. प्रभाकर मलेशप्पा हुंबी (वय ६५) आणि मंजुनाथ प्रभाकर हुंबी (वय ३०, दोघे उडकेरी, ता. बैलहोंगल) अशी मृत्यू झालेल्यांची नावे आहेत.

घटनेची नोंद दोडवाड पोलिस (Dodwad Police) ठाण्यात झाली आहे. पोलिसातून समजलेली माहिती अशी, हुंगी यांच्या घरासमोर असलेल्या खांबावरील वीज तार तीन महिन्यांपूर्वी तुटून पडली होती. त्यावेळी हेस्कॉमच्या कर्मचाऱ्यांनी ही तार पुन्हा जोडली होती. काल झालेल्या मुसळधार पावसामुळे पुन्हा खांबावरील तार तुटून खाली पडली.

मात्र, त्याची कल्पना हुंबी कुटुंबीयांना आली नाही. काल सकाळी प्रभाकर हे खांबाशेजारी असलेले गवत आणण्यासाठी गेले होते. त्यावेळी पडलेल्या तारेला त्यांनी स्पर्श केला. त्यामुळे त्याचा जागीच मृत्यू झाला. काही वेळानंतर मुलगा मंजुनाथच्या निदर्शनाची घटनाआली. त्यामुळे त्याने वडिलांना स्पर्श केला.

त्यावेळी त्याला विजेचा धक्का बसला ही घटना उघडकीस आल्यानंतर काहींनी जखमी अत्यव्यस्थ मंजुनाथला रुग्णालयात दाखल केले. मात्र, त्याचा उपचाराचा उपयोग न झाल्याने मंजुनाथचा काही वेळातच मृत्यू झाला. घटनेची माहिती समजताच दोडवाड पोलिसांनी घटनास्थळी भेट देऊन पंचनामा केला.