कोलकता - मार्क्सवादी कम्युनिस्ट पक्षाच्या देशभरातील कार्यालयात यंदा स्वातंत्र्यदिनी प्रथमच पक्षाच्या झेंड्याऐवजी तिरंगा फडकविण्यात येणार आहे. नवी दिल्लीतील एकेजी भवन येथे झालेल्या पक्षाच्या केंद्रीय समितीच्या बैठकीत हा निर्णय घेण्यात आला. तीन दिवसांच्या बैठकीचा समारोप काल झाला. त्यानंतर ‘माकप’चे सरचिटणीस सीताराम येचुरी यांनी १५ ऑगस्ट रोजी पक्ष कार्यालयांत तिरंगा फडकविण्याची घोषणा केली. स्वातंत्र्याच्या अमृतमहोत्सवानिमित्त वर्षभर विविध कार्यक्रमांचे आयोजनही करणार असल्याचे त्यांनी सांगितले. (Politics News)

स्‍वातंत्र्यसंग्रामात समाजवाद्यांच्या योगदानाची माहिती देण्यासाठी एक मोहीमही सुरू करणार आहे. सत्तरीच्या दशकाच्या मध्यात पश्‍चिम बंगालमध्ये ‘माकप’च्या नेतृत्वाखाली डाव्या आघाडीचे सरकार सत्तेवर आल्यानंतर तत्कालीन मुख्यमंत्री ज्योती बसू यांनी स्वातंत्र्यदिनी कोणत्याही शासकीय किंवा पक्षाच्या कार्यक्रमांमध्ये राष्ट्रीय झेंडावंदन करण्याचे टाळले होते. मात्र यावर सर्व थरांतून टीका झाल्यानंतर रायटर्स बिल्डिंगसमोर होणाऱ्या सरकारी झेंडावंदन कार्यक्रमात १९८२ पासून तिरंगा फडकाविण्यास सुरुवात केली.

डाव्यांचे अस्तित्व पुसले

भारताच्या स्वातंत्र्यदिनी डावे पक्ष त्यांच्या कार्यालयांमधील कार्यक्रमात केवळ पक्षाचा लाल रंगाच्या झेंडा फडकवितात. काही ठिकाणी स्थानिक पातळीवर डाव्यांच्या कार्यालयांमध्ये या दिवशी एका वेगळ्या खांबावर तिरंगाही फडकविला जातो. लोकसभा व विधिमंडळात बंगालमधील डाव्या आघाडीचा एकही सदस्य नसल्याचे चित्र स्वातंत्र्यानंतर यावेळी प्रथमच दिसत आहे.