नवी दिल्ली : काँग्रेसच्या नेत्या सोनिया गांधी, रेल्वेमंत्री अश्विनी वैष्णव यांच्यासह चौदा नेत्यांनी गुरुवारी राज्यसभा सदस्यत्वाची शपथ घेतली. राज्यसभा सभापती जगदीप धनकड यांनी नवनिर्वाचित सदस्यांना पद आणि गोपनीयतेची शपथ दिली.

याशिवाय अजय माकन, सय्यद नासिर हुसेन (काँग्रेस), आर. पी. एन. सिंह, मदन राठोड, सामिक भट्टाचार्य (भाजप), संजयकुमार झा (संयुक्त जनता दल), शुभाशिष खुंटीया, देबाशिष सामंतराय (बिजू जनता दल), गोल्ला बाबूराव, एम. आर. रेड्डी, वाय. व्ही. सुब्बा रेड्डी (वायएसआर काँग्रेस) आणि रवीचंद्र वाडीराजू (बीआरएस) यांनी शपथ घेतली.

सोनिया गांधी राजस्थानमधून तर अश्विनी वैष्णव ओडिशामधून राज्यसभेवर निवडून गेले होते. काँग्रेसचे कोशाध्यक्ष अजय माकन व सय्यद नासिर हुसेन हे कर्नाटकमधून, आर. पी. एन. सिंह हे उत्तर प्रदेशातून, मदन राठोड हे राजस्थानमधून राज्यसभेवर निवडून गेले होते. सोनिया गांधी या पहिल्यांदाच वरिष्ठ सदनाच्या सदस्या बनल्या आहेत.