लखनऊ : माफीया आणि राजकारणी बनलेल्या आतिक अहमद याला महिनाभरापूर्वी काही तरुणांनी पोलिसांसमोरच गोळ्या घालून ठार केलं होतं. त्यानंतर आता आणखी एका गँगस्टरची हत्या झाली आहे. उत्तर प्रदेशातील लखनऊ येथील कोर्टात हा खळबळजनक प्रकार घडला आहे. (Gangster Sanjeev Jeeva shot dead by unknown assailants outside a Lucknow court)

लखनऊ कोर्टाच्या आवारात घडलेल्या या घटनेचे व्हिडिओ देखील सोशल मीडियावर व्हायरल झाले आहेत. सध्या तुरुंगात असलेल्या गँगस्टर मुख्तार अन्सारीचा संजीव जीवा हा जवळचा सहकारी होता. जीवाची बुधवारी सकाळी कोर्टाच्या आवारात हत्या करण्यात आली.

या घटनेची माहिती देताना जिल्हादंडाधिकारी सुर्यपाल गंगवार यांनी सांगितलं की, "संजीव जीवा या व्यक्तीवर गोळीबार करण्यात आला. यामध्ये हल्ल्यात त्याला मृत घोषीत करण्यात आलं आहे. ही घटना घडली त्यावेळी तिथं एक लहान मुलगी देखील होती, ती यात जखमी झाली असून तिला केजीएमयू रुग्णालयात उपचारांसाठी दाखल करण्यात आलं आहे"

आरोपींनी वकिलाच्या पेहरावात येऊन झाडल्या गोळ्या

आरोपींनी वकिलाच्या पेहरावात येऊन भर कोर्टात गोळ्या झाडल्या. यामुळं एकच खळबळ उडाली. यांपैकी एकाला पोलिसांनी ताब्यात घेतला आहे. जौनपूर इथल्या केराकतचा निवासी विजय यादव असं त्याचं नाव असल्याचं सांगितलं जात आहे.