नवी दिल्लीः केंद्र सरकारने राष्ट्रीय बचत प्रमाणपत्र (NSC), सुकन्या समृद्धी योजना, ज्येष्ठ नागरिक बचत योजना यासह अन्य योजनांच्या व्याजदरामध्ये वाढ केली आहे. ही वाढ १० ते ३० बीपीएसपर्यंत आहे.

केंद्र सरकारने छोट्या बचत योजनांमध्ये यापूर्वीदेखील वाढ केली होती. आता पुन्हा या योजनांच्या व्याजदरात वाढ केली आहे. आज दि. ३० जून रोजी अर्थमंत्रालयाने याबाबत माहिती दिली.

राष्ट्रीय बचत प्रमाणपत्र अर्थात एनएससी यामध्ये सर्वात जास्त वाढ करण्यात आलेली आहे. या योजनेचा व्याजदर ७ टक्क्यांवरुन ७.७ टक्क्यांवर वाढवलेला आहे. सध्या सर्वात जास्त चर्चेत असलेली सुकन्या समृद्धी योजनेच्या व्याजदरात वाढ करण्यात आलीय. ७.६ टक्क्यांवरुन ८ टक्के वाढ करण्यात आलीय.

यासह ज्येष्ठ नागरिक बचत योजनेमध्ये ८ टक्क्यांचा व्याजदर वाढवून ८.२ टक्के करण्यात आलेला आहे. जुलै ते सप्टेंबर या तिमाहीसाठी ही वाढ १० ते ३० बीपीएसच्या श्रेणीत असेल.

तसेच पीपीएफ म्हणजे सार्वजनिक भविष्य निर्वाह निधी-७.१ टक्के आणि बचत ठेवींवर असलेलं व्याज ४ टक्के कायम ठेवण्यात आलेलं आहे. किसान विकास पत्र १२० महिन्यांऐवजी ११५ महिन्यात मॅच्युअर होईल. तसेच मासिक उत्पन्न योजनेवरील व्याज ०.३ टक्क्यांनी वाढवून ७.४ टक्के करण्यात आले आहे. अर्थ मंत्रालयाने याबाबत निर्णय जाहीर केला आहे.