नवी दिल्ली- ओडिशाच्या राजभवनमध्ये तैनात असणाऱ्या एका अधिकाऱ्याने धक्कादायक आरोप केले आहेत. राज्यपाल रघुबर दास यांच्या मुलाने त्याला घेण्यासाठी लक्झरी कार न पाठवलेल्यामुळे मारहाण झाल्याचं त्यांनी म्हटलं आहे. अधिकाऱ्याने याप्रकरणी राज्यपालांच्या मुख्य सचिवांना लिखित तक्रार केली आहे.

माहितीनुसार, बैकुंठा प्रधान ( वय ४७) हे राजभवनमध्ये असिस्टंट सेक्शन ऑफिसर म्हणून तैनात आहेत. त्यांनी आरोप केलाय की, दास यांचा मुलगा ललीत कुमार आणि इतर पाच जणांनी त्यांना चापटा-लाथा मारल्या आणि मारहाण केली. ७ जुलैला ही घटना राजभवन परिसरातच घडली आहे. राष्ट्रपती द्रौपती मुर्मू यांच्या भेटीदरम्यान तयारीवर लक्ष ठेवण्यासाठी त्यांची पोस्टिंग झाली होती.

१० जुलै रोजी प्रधान यांनी लिखित तक्रार सचिवांकडे दाखल केली आहे. पण, इंडियन एक्स्प्रेसच्या रिपोर्टनुसार, राजभवनचे अधिकारी आणि सचिव ससवत मिश्रा यांनी याप्रकरणी प्रतिक्रिया दिलेली नाही. तक्रारीमध्ये प्रधान यांनी म्हटलंय की, पुरीतील राजभवनाचा चार्ज असल्याने ५ जुलेपासून मी तेथे तैनात होतो. राष्ट्रपती द्रौपती मुर्मू या राजभवनात येणार असल्याने तयारीवर देखरेख ठेवण्याची जबाबदारी माझ्यावर होती.

प्रधान यांनी आरोप केलाय की, ७ जुलै रोजी रात्री बाराच्या सुमारास ते ऑफिस रुममध्ये बसले होते. राज्यपालांचा खासगी स्वयंपाकी आला अन् त्याने सांगितलं की कुमार यांनी बोलावलं आहे. ज्यावेळी कुमार यांनी मला पाहिलं, तेव्हा त्यांनी मला शिवीगाळ सुरु केली. मी जेव्हा या अपमानाला विरोध केला तेव्हा त्यांनी मला मारहाण सुरु केली.

प्रधान यांनी दावा केलाय की, यानंतर त्यांनी तेथून पळ काढला आणि लपून बसले. पण, त्यांना शोधण्यात आले आणि त्यांना पुन्हा मारहाण करण्यात आली. याप्रकरणी प्रधान यांच्या पत्नी सयोज या ११ जुलै रोजी पोलीस स्टेशनमध्ये तक्रार करण्यासाठी गेल्या होत्या, पण तक्रार स्वीकारण्यात आलेली नाही असं कळतंय. त्यामुळे पोलिसांना ईमेल केल्याचं त्यांनी सांगितलं.