लोकसभा निवडणूक २०२४ च्या आगोदर विरोधीपक्षांच्या एकजुटीसाठी २३ जून रोजी पटणा येथे बैठक होणार आहे. मात्र या बैठकीपूर्वीच नितीश कुमार सरकारला जोरदार धक्का बसला आहे. माजी मुख्यमंत्री जीतन राम मांझी यांचे पुत्र आणि हिंदुस्तानी आवामी मोर्चा (Hindustani Awam Morcha) चे एकमेव मंत्री संतोष मांझी यांनी राजीनामा दिला आहे.

नितीश कुमार यांच्या पक्षासोबत युतीत अनुसूचित जाती-जमाती कल्याणमंत्री राहिलेल्या सुमन यांनी राजीनाम्यापूर्वी अर्थमंत्र्यांशी दीर्घ चर्चा देखील केली. दरम्यान संतोष सुमन ऊर्फ संतोष मांझी यांचा राजीनामा स्वीकारण्यात आला आहे की नाही याबाबत मुख्यमंत्र्यांकडून अद्याप कोणतेही वक्तव्य किंवा माहिती देण्यात आलेली नाही. राजीनामा स्वीकारल्यास तो राज्यपालांकडे पाठवला जाईल.

मंत्रिमंडळाचा राजीनामा दिल्यानंतर संतोष सुमन म्हणाले की, आम्हाला विरोधी एकजुटीसाठी कोणताही फोन आलेला नाही, कारण जेडीयूला आमच्या संपूर्ण पक्षाचे विलीनीकरण हवे होते. पक्ष म्हणून आमच्या अस्मितेवर प्रश्नचिन्ह होते, त्यामुळे 'हम'चे (HAM) कुटुंब फोडण्याएवजी सरकार सोडणे हाच शेवटचा पर्याय होता. आम्ही पक्षासाठी मेहनत घेत आहोत, त्यामुळे असा पर्याय निवडणे शक्य नसल्याचे त्यांनी सांगितले.

विरोधी एकता बैठकीचे निमंत्रण नाही

संतोष कुमार सुमन यांनी नाराजी व्यक्त करत २३ जून रोजी पटणा येथे होणाऱ्या विरोधक एकजुटीसाठी होत असलेल्या बैठकीपासून आम्हाला दूर ठेवण्यात आले असल्याचे म्हटले आहे . सोमवारी माजी मुख्यमंत्री जीतनराम मांझी यांनी विरोधी ऐक्याच्या नावाखाली पाटणा येथे होणाऱ्या बैठकीचे निमंत्रण मिळाले नसल्याचे उघडपणे मान्य केले होते. काही दिवसांपूर्वीपर्यंत मांझी सातत्याने मुख्यमंत्री नितीश कुमार यांचा पाठिंबा सोडणार नसल्याचे सांगत होते, मात्र संतोष मांझी यांच्या या निर्णयानंतर जीतन राम आपला शब्द पाळू शकले नाहीत हे उघड झाले आहे.

माजी मुख्यमंत्री जीतन राम मांझी म्हणाले की २०२४ च्या लोकसभा निवडणुकीत आमचा पक्ष एका जागेवर लढणार नाही. प्रसारमाध्यमांनी त्यांना विचारले की, तू चेष्टा करताय का? उत्तर देताना मांझी म्हणाले की, तुम्हाला जे समजायचे आहे ते समजून घ्या, पण आमचा पक्ष एका जागेवर लोकसभा निवडणूक लढवणार नाही.