हिमाचल प्रदेशमधील विधानसभा निवडणुकीसाठी काँग्रेसने ४६ उमेदवारांची पहिली यादी जाहीर केली आहे. एकिकडे पक्षवाढीसाठी राहुल गांधी देशभर फिरत आहेत. तर दुसरीकडे उमेदवारांची यादी जाहीर होताच बंडखोरीचे वारे वाहू लागले आहे. काँग्रेस नेते आदित्य विक्रम सिंह यांनी नाराजी व्यक्त केली आहे. त्यामुळे काँग्रेसमधील कलह चव्हाट्यावर आला आहे. (Himachal Assembly Polls aaditya vikram singh resigned from congress Announces 46 Candidates )

पक्ष वाढीसाठी काँग्रेस नेते राहुल गांधी भारत जोडो यात्रेच्या माध्यमातून देश पिंजून काढत आहेत. तर दुसरीकडे अनेक दिवसांपासून रखडलेल्या काँग्रेस पक्षाच्या अध्यक्षपदाच्या निवडणूकीचा निकाल देखील आज लागणार आहे. अशा परिस्थितीत पक्षाला गळती लागली आहे.

कुल्लूच्या बंजार मतदारसंघातून तिकीट न मिळाल्याने आदित्य विक्रम सिंह यांनी पक्षाचा राजीनामा दिला आहे. त्यामुळे आदित्य विक्रम सिंह हे भाजपमध्ये जाणार असल्याचा चर्चेला उधाण आलं आहे. मात्र, त्यांनी पुढे कोणत्या पक्षात प्रवेश करणार याबद्दल अद्याप कोणतीही घोषणा केलेली नाही.

२०१७ मध्ये झालेल्या निवडणूकीत काँग्रेसकडून आदित्य विक्रम सिंह मैदानात उतरले होते. मात्र, त्यांना पराभव स्विकारावा लागला होता.

दरम्यान, आगामी निवडणुकीसाठी निवडणूक आयोगाकडून हिमाचल प्रदेशमधील विधानसभेच्या 68 जागांसाठी निवडणूकांची घोषणा करण्यात आली आहे. हिमाचल प्रदेश विधानसभेची मुदत 8 जानेवारी 2023 ला संपत असून त्या अगोदर निवडणूका घेतल्या जाणार आहेत.

हिमाचल मधील एकूण 68 जागांपैकी एससीसाठी 17 जागा आणि एसटीसाठी 3 जागा राखीव आहेत. तर हिमाचलमधील मतदान हे एकाच टप्प्यात घेतलं जाणार आहे. 12 नोव्हेंबरला मतदान होणार आहे तर 8 डिसेंबरला निवडणूकीचा निकाल जाहीर करण्यात येणार आहे.