नवी दिल्ली - पंतप्रधान नरेंद्र मोदी यांच्या नेतृत्वाखाली भारत युक्रेनवरील रशियन आक्रमणाचा गंभीर प्रश्न सोडवण्यासाठी जगाला प्रेरित करू शकतो, असा दावा फ्रान्सचे राष्ट्राध्यक्ष इमॅन्युएल मॅक्रॉन यांनी मंगळवारी (१४ फेब्रुवारी) केला. युक्रेनवरील रशियन आक्रमणाच्या कठीण काळात भारतातील G20 अध्यक्षपदाच्या यशासाठी आम्ही काम करत असल्याचं ते म्हणाले. (Emmanuel Macron news in Marathi)

भारताची एअर इंडिया आणि फ्रान्सची एअरबस यांच्यात विमान खरेदीच्या कराराच्या निमित्ताने झालेल्या व्हिडिओ कॉन्फरन्समध्ये मॅक्रॉन बोलत होते. मॅक्रॉन म्हणाले, "तुमच्या नेतृत्वाखाली भारत संपूर्ण जगाला स्पष्टपणे प्रेरित करू शकतो आणि आपल्यासमोरील गंभीर प्रश्न सोडवण्यास मदत करू शकतो." युक्रेनमधील हल्ल्यावर भारताने रशियावर जाहीरपणे टीका केलेली नाही. मात्र पंतप्रधान नरेंद्र मोदी यांनी गेल्या वर्षी रशियाचे अध्यक्ष व्लादिमीर पुतिन यांना सांगितले होते. की 'आजचे युग युद्धाचे नाही'.

मॅक्रॉन म्हणाले की, एअर इंडिया आणि एअरबस यांच्यात 250 विमाने खरेदी करण्याचा करार हा भारत आणि फ्रान्स यांच्यातील धोरणात्मक आणि मैत्रीपूर्ण भागीदारीतील एक मैलाचा दगड आहे. "हे यश दर्शवते की एअरबस आणि सॅफ्रानसह त्याचे भागीदार भारतासोबत सहकार्याची नवीन क्षेत्रे विकसित करण्यासाठी पूर्णपणे वचनबद्ध आहेत. आम्ही भारतासोबत अंतराळापासून सायबरपर्यंत, संरक्षणापासून संस्कृतीपर्यंत, आरोग्यापासून आरोग्यसेवेपर्यंत भागीदारी केली आहे.