Indian Army Video : देशाच्या सुरक्षेसाठी भारतमातेचे जवान हे सीमेवर 24 तास तैनात असतात. बर्फाळ डोंगरांवर त्यांना कितीतरी आव्हानांना तोंड द्यावं लागतं. मात्र, डोळ्याची पापणीही लवू न देता ते देशाची रक्षा करत राहतात.

देशाच्या जवानांचा एक व्हिडिओ सध्या सोशल मीडियावर व्हायरल होतो आहे. यामध्ये काही जवान दुपारचं जेवण करत आहेत. त्यांच्याकडे असणारी चपाती एवढी कोरडी झाली आहे, की ती तोडण्यासाठी त्यांना भरपूर प्रयत्न करावे लागत आहेत. मात्र, कोणतीही तक्रार न करता ते अगदी हसत-खेळत जेवण करत आहेत.

आरव्हीसीजे मीडिया या एक्स (ट्विटर) हँडलवरुन हा व्हिडिओ पोस्ट करण्यात आला आहे. यामध्ये एक जवान मजेत म्हणत आहे, की ही चपाती तोडण्यासाठी करवत मिळेल का? त्यावर दुसरा जवान उत्तर देतो, की 'आज बाकी दिवसांच्या तुलनेत मऊ चपाती बनवली आहे' यावर सगळे हसू लागतात, आणि आपलं जेवण सुरू ठेवतात.

एकीकडे छोट्या-छोट्या गोष्टींसाठी तक्रार करणारे आपण सगळे, आणि तिकडे सीमेवर प्रतिकूल परिस्थितीमध्येही हसत-खेळत जेवण करणारे जवान असा फरक स्पष्ट दाखवणारा हा व्हिडिओ नेटिझन्सना भरपूर पसंत पडत आहे. 'भारतीय जवानांच्या शौर्याला सलाम', 'यावर विश्वास बसत नाही', 'हे आपले खरे हीरो आहेत' अशा आशयाच्या कमेंट्स या व्हिडिओला मिळत आहेत.