कवरत्ती : भारतीय तटरक्षक दलाच्या (Indian Coast Guard) जवानांनी लक्षद्वीपच्या किनाऱ्यावर दोन बोटींना ताब्यात घेतले आहे. त्या बोटींमधून जवळपास 1520 कोटींचे ड्रग्स जप्त करण्यात आले आहे. भारतीय तटरक्षक दल आणि महसूल गुप्तचर संचलनालयासोबत सुरू केलेल्या 'खोजबीन' या संयुक्त मोहिमेंतर्गत ही कारवाई करण्यात आली आहे.

समुद्रामार्गे होत असलेल्या अंमली पदार्थाची तस्करी रोखण्यासाठी भारतीय तटरक्षक दल आणि महसूल गुप्तचर संचलनालय यांनी संयुक्तपणे एक मोहिम राबवली आहे. 'खोजबीन' असं या मोहिमेचं नाव असून त्यांच्या या संयुक्त मोहिमेअंतर्गत ही कारवाई करण्यात आली असल्याचं भारतीय तटरक्षक दलाच्या जवानांनी सांगितलं आहे. दरम्यान लक्षद्वीप बेटांच्या किनाऱ्याजवळ त्यांना दोन संशयित बोटी आढळल्या होत्या. त्यानंतर भारतीय तटरक्षक दलाच्या बोटीने त्यांचा पाठलाग सुरू केला. प्रिन्स आणि लिटल जिझस असं या बोटींचं नाव होतं.

जवानांनी त्यांची चौकशी केल्यानंतर त्यांच्याकडे 1520 कोटी रुपयांचे अंमली पदार्थ सापडले. त्यानंतर त्या दोन्ही बोटींसह 1520 कोटींचा मुद्देमाल जवानांकडून जप्त करण्यात आला आहे. याबरोबरच पुढील तपास सुरू असल्याचं तटरक्षक दलांच्या जवानांनी सांगितलं.