भोपाळ : नैराश्‍याचे वातावरण दूर करण्यासाठीच नरेंद्र मोदी यांनी जन्म घेतला असून भगवान राम आणि भगवान श्रीकृष्णाप्रमाणेच ते देवाचे अवतार आहेत, असे विधान मध्य प्रदेशचे कृषी मंत्री आणि भाजप नेते कमल पटेल यांनी आज केले आहे. काँग्रेसने केलेले अत्याचार, भ्रष्टाचार आणि देशातील संस्कृतीचे अध:पतन झाल्याने देशात नैराश्‍याचे वातावरण निर्माण झाल्याचा दावा पटेल यांनी केला. (Narendra Modi)

पत्रकारांशी बोलताना कमल पटेल म्हणाले की, ‘देशाला विश्‍वगुरु बनविण्याच्या मार्गावर नेणे, भ्रष्टाचारावर नियंत्रण मिळविणे अणि समाजाचे कल्याण करणे या गोष्टी सामान्य व्यक्तीला करता येण्यासारख्या नाहीत. भारतावर ज्या ज्या वेळी संकट येते आणि अनाचार वाढतो, त्यावेळी आपल्या धर्मात असे म्हटले आहे की, देवच मानवाच्या रुपात अवतार घेतो.

भगवान श्रीरामाने मानवी रुपात येत रावणाचा वध केला आणि रामराज्य स्थापन केले. कंसाचे अत्याचार वाढले त्यावेळी कृष्णाने जन्म घेत सामान्य लोकांची त्रासातून सुटका केली. त्याच प्रमाणे काँग्रेसकडून अत्याचार, भ्रष्टाचार, जातीवाद वाढला आणि देशाची संस्कृती नष्ट होऊन सर्वत्र नैराश्‍याचे वातावरण निर्माण झाले असताना ते सर्व नष्ट करण्यासाठी नरेंद्र मोदींचा जन्म झाला आहे.’

कमल पटेल यांनी गेल्या वर्षी नोव्हेंबरमध्येही अशाच प्रकारचे विधान केले होते. मध्य प्रदेशचे मुख्यमंत्री शिवराजसिंह चौहान हे तंट्या भिल्ल प्रसिद्ध आदिवासी नेत्याचे अवतार आहेत, असे पटेल म्हणाले होते. तंट्या भिल्ल यांना आदिवासी साहित्यामध्ये भारतीय ‘रॉबिनहूड’ असे संबोधले गेले आहे.

''सामान्य लोकांना अशक्य असलेली कामे मोदींनी करून दाखविली आहेत. ही कामे गेल्या साठ वर्षांतही होऊ शकली असती. त्यामुळेच पंतप्रधान मोदी हे अवतारी पुरुष आहेत. ते देवाचा अवतार आहेत.''

- कमल पटेल, भाजप नेते