Karnataka Election 2023 : कर्नाटक विधानसभा निवडणुकीत भाजपकडून (BJP) तिकीट न मिळाल्यामुळं पक्षातील अनेक बड्या नेत्यांनी पक्षत्याग केला. कर्नाटकचे माजी मुख्यमंत्री जगदीश शेट्टर यांनी सांगितलं की, 'आपला स्वाभिमान दुखावला गेला, त्यामुळंच मी भाजप सोडण्याचा निर्णय घेतला'.

अलीकडंच, शेट्टर (Jagdish Shettar) यांनी भाजपचा राजीनामा देऊन काँग्रेसमध्ये प्रवेश केलाय. एएनआय या वृत्तसंस्थेशी बोलताना जगदीश शेट्टर म्हणाले, यापूर्वी भाजपतर्फे हुबळी-धारवाड मतदारसंघातून अनेकांनी निवडणूक लढवली. मात्र, त्यांचा इथं पराभव झाला. मी पक्षाला इथं विजयी मिळवून दिलाय. 1994 मध्ये मी पहिल्यांदा निवडणूक लढवली आणि जिंकली. त्यानंतर सतत मी निवडणूक जिंकत आहे, त्यामुळंच लोकांचा माझ्यावरचा विश्वास वाढला असल्याचं त्यांनी स्पष्ट केलं.

'माझा स्वाभिमान दुखावला'

आगामी कर्नाटक विधानसभा निवडणुकीसाठी भाजपकडून तिकीट न देणं हा माझा अपमान आणि स्वाभिमान दुखावणारा असल्याचं जगदीश शेट्टर म्हणाले. मी त्यांना (भाजप) आव्हान देतोय. काँग्रेसमध्ये प्रवेश केल्यानंतर मी माझ्या मूळ मतदारसंघातील हुबळी-धारवाड मतदारसंघात गेलोय. लोकांनी इथं माझं जोरदार स्वागत केलंय, असं त्यांनी सांगितलं.

माजी मुख्यमंत्री शेट्टार म्हणाले, मला काँग्रेस पक्षाकडून इतका सन्मान मिळेल, असं कधीच वाटलं नव्हतं. काँग्रेसचे अध्यक्ष मल्लिकार्जुन खर्गे आणि इतरांनी मला काँग्रेसकडून नेहमीच सन्मान मिळेल, असं आश्वासन दिलंय. मला फक्त आदर हवा आहे. मला सत्तेची भूक नाहीये, असंही त्यांनी स्पष्ट केलं. दरम्यान, जगदीश शेट्टर हे 2023 ची कर्नाटक निवडणूक काँग्रेसच्या तिकीटावर हुबळी-धारवाड मध्य मतदारसंघातून लढणार आहेत.