बंगळूर : राज्याच्या राजकारणात (Karnataka Politics) अनपेक्षित घडामोडी घडत असताना माजी मुख्यमंत्री बी. एस. येडियुराप्पा (B. S. Yediyurappa) यांचे पुत्र आणि शिकारीपूरचे आमदार बी. वाय. विजयेंद्र (B. Y. Vijayendra) यांना दिवाळी भेट देताना भाजप हायकमांडने (BJP High Command) प्रदेशाध्यक्ष म्हणून निवड केली.

शुक्रवारी भाजपचे राष्ट्रीय अध्यक्ष जे. पी. नड्डा यांनी ४७ वर्षीय विजयेंद्र यांची भाजप प्रदेशाध्यक्षपदी नियुक्ती करणारा आदेश जारी केला. यापूर्वी ते भाजपचे उपाध्यक्ष होते. गेल्या विधानसभा निवडणुकीत पराभूत झाल्यानंतर नलिनकुमार कटील यांनी प्रदेशाध्यक्षपदाचा राजीनामा दिला होता. त्यानंतर भाजप प्रदेशाध्यक्ष कोण होणार, याबाबत मोठी उत्सुकता होती.

लिंगायत समाजाचा भाजपला पाठिंबा राहावा यासाठी विजयेंद्र यांच्याकडे ही जबाबदारी देण्यात आली आहे. आता विधानसभेत विरोधी पक्षनेता कोण होणार याची उत्सुकता आहे. निवडणुकीनंतर प्रदेश भाजपचे नेतृत्व कोणाकडेच नव्हते. भाजपने युवा नेते विजयेंद्र यांच्याकडे भाजप नेतृत्व सोपवले आहे.

२०२० पासून ते कर्नाटकात भाजपचे प्रदेश उपाध्यक्ष आहेत. याआधी त्यांनी भाजप युवा मोर्चाच्या कर्नाटक युनिटचे सरचिटणीस म्हणून काम केले आहे. विजयेंद्र हे पेशाने वकील आहेत आणि त्यांचे भाऊ बी. वाय. राघवेंद्र हे शिमोगा लोकसभा मतदारसंघातून खासदार म्हणून निवडून आले आहेत.

विजयेंद्र यांचे हार्दिक अभिनंदन. मला आशा आहे की, तुमच्या अध्यक्षपदाच्या काळात पक्ष संघटनात्मकदृष्ट्या अधिक बळकट होईल आणि अधिक सामर्थ्यशाली म्हणून उदयास येईल.

-बसवराज बोम्मई, माजी मुख्यमंत्री