बंगळूर : लैंगिक छळ आणि अपहरण प्रकरणात आरोपी असलेले माजी मंत्री आणि होळेनरसिंपूरचे धजद आमदार एच. डी. रेवण्णा (H. D. Revanna) यांना विशेष तपास पथकाने (SIT) शनिवारी ताब्यात घेतले. रेवण्णा यांना अपहरणप्रकरणी ताब्यात घेण्यात आल्याचे सूत्रांनी सांगितले.

रेवण्णा यांना शनिवारी संध्याकाळी त्यांचे वडील आणि माजी पंतप्रधान आणि धजद सुप्रिमो एच. डी. देवेगौडा यांच्या पद्मनाभनगर येथील घरातून चौकशी पथकाने ताब्यात घेतले होते. काही क्षणांतच त्यांना अपहरण प्रकरणाच्या संदर्भात विशेष न्यायालयाने अंतरीम दिलासा नाकारला होता. त्यांना एसआयटी कार्यालयात नेण्यात आले.

पहिला गुन्हा २८ एप्रिल रोजी हासनमधील होळेनरसिंपूर टाऊन पोलिस स्टेशनमध्ये नोंदवण्यात आला होता. जिथे रेवण्णा आणि त्यांचा मुलगा, हासनचे धजद खासदार प्रज्वल रेवण्णा (Prajwal Revanna) यांच्यावर ४७ वर्षीय गृहिणीचा लैंगिक छळ केल्याचा आरोप होता.

४४ वर्षीय हासन जिल्हा पंचायत सदस्याने प्रज्वलवर वारंवार बलात्कार केल्याचा आरोप केल्यानंतर सीआयडीने एक मे रोजी दुसरा गुन्हा दाखल केला. तिसरा गुन्हा २ मे रोजी म्हैसूरमधील केआरनगर पोलिस स्टेशनमध्ये नोंदवला. रेवण्णा आणि सतीश बबन्ना यांच्यावर प्रज्वलने लैंगिक अत्याचार केलेल्या पीडितेचे अपहरण केल्याचा आरोप नोंदवला होता. संशयित बबन्ना याला शुक्रवारी अटक करून न्यायालयीन कोठडी सुनावण्यात आली. शनिवारी तपासकर्त्यांना एका फार्महाऊसमधून अपहृत महिला सापडली. ती म्हैसूरच्या हुन्सूर तालुक्यातील कालेनहळ्ळी गावातील होती.

जामिनास नकार

दरम्यान, यापूर्वी के.आर. नगर पोलिसांनी नोंदवलेल्या अपहरणाच्या गुन्ह्यासंदर्भात माजी मंत्री आणि धजद नेते एच. डी. रेवण्णा यांना अंतरिम जामीन देण्यास लोकप्रतिनिधी विशेष न्यायालयाने नकार दिला. याआधी एसआयटीने आमदार एच. डी. रेवण्णा यांच्याविरुद्ध दुसरी लुकआउट नोटीस जारी केली होती. या प्रकरणाची चौकशी करणाऱ्या एसआयटीसमोर चौकशीसाठी हजर राहण्यासाठी आज संध्याकाळपर्यंत वेळ देण्यात आली होती.