Crime Against Minor Girl:भारतात जेव्हा एखादा विद्यार्थी मनाशी डॉक्टर किंवा इंजिनिअर व्हायची इच्छा बाळगतो, तेव्हा या स्पर्धा परीक्षांच्या तयारीसाठी त्याच्या तोंडावर पहिलं नाव असतं ते म्हणजे 'कोटा फॅक्टरी'चं म्हणजेच कोटा शहराचं. अनेक विद्यार्थी आणि विद्यार्थिनी नीट आणि जेईई स्पर्धांच्या तयारीसाठी कोटाची वाट धरतात. मात्र, डॉक्टर बनण्याचं स्वप्न उरी बाळगणाऱ्या एका १५ वर्षीय विद्यार्थीनीवर अत्याचाराची घटना या कोटा शहरात घडली आहे.

नीट परीक्षेच्या तयारीसाठी कोटा शहरात आलेल्या १५ वर्षीय विद्यार्थीनीवर होस्टेल कर्मचाऱ्याकडून बलात्कार कऱण्यात आला आहे. होस्टेलमध्ये काम करणाऱ्या एका २२ वर्षीय कर्मचाऱ्याने तिच्यावर अनेकदा बलात्कार केला. या प्रकरणात होस्टेल कर्मचारी आणि होस्टेल मालकाला पोलिसांनी अटक केली आहे.

पोलीस अधिक्षक शरद चौधरी म्हणाले की २२ वर्षीय कर्मचारी आणि होस्टेल मालकाला मुलीने तक्रार दाखल केल्यानंतर अटक करण्यात आली. पीडित मुलीने मंगळवारी (दि. १० ऑक्टोबर) कँटीन कर्मचाऱ्याविऱोधात तक्रार नोंदवली. यात त्या मुलीने आरोप केला की फेब्रुवारी महिन्यात या कर्मचाऱ्याने तिच्यावर वारंवार बलात्कार केला.

पीडित मुलगी मागील काही महिन्यांपासून वैद्यकीय प्रवेश परीक्षेचा अभ्यास करण्यासाठी कोटा शहरात आली होती. त्यानंतर तिने एका होस्टेलमध्ये प्रवेश घेतला. आरोपी या होस्टेलमध्ये कँटीनमध्ये काम करायचा आणि तिला दररोज जेवण वाढायचा. फेब्रुवारी महिन्यात या युवकाने तिला बळजबरीने दारु पाजली आणि त्यानंतर तिला दुसऱ्या ठिकाणी नेऊन अत्याचार केलाय. याबद्दल तपास अधिकारी वासुदेव सिंह यांनी माहिती दिली. आरोपीने या काळात ६ वेळा तिच्यावर अत्याचार केला आणि त्यांचं चित्रीकरण करुन सोशल मीडियावर व्हायरल करण्याची धमकी देत होता.(Latest Marathi News)

पोलिस अधिक्षक सिंग म्हणाले की,या अत्याचाराची तक्रार तिने सुरुवातीला होस्टेल मालकाला केली आणि त्याच्यावर कारवाई करण्याची मागणीही केली. याउलट, होस्टेल मालकाने तिला त्या मुलाशी लग्न करण्याचा सल्ला दिला आणि म्हणाला की जर ही गोष्ट बाहेर समजली, तर तुझ्या घरच्यांची इज्जत धुळीस मिळेल. त्यानंतर होस्टेल मालकाने ही गोष्ट कोणालाही न सांगण्याची धमकी दिली.

मुख्य आरोपी आणि होस्टेल मालकाविरोधात भारतीय दंड संहितेच्या कलम ३७६-२, ३६३ , ३६६ अ, ३६८, ५०४, ५०६, ३४१, ३२३ आणि POCSO आणि आयटी कायद्याअंतर्गत गुन्ह्याची नोंद करण्यात आली आहे. (Latest Marathi News)