दिल्लीत दारू धोरणावरून (Liquor Policy) गदारोळ सुरु असतानाच अंमलबजावणी संचालनालयानं (ED) 40 ठिकाणी छापे टाकले आहेत. तर, हैदराबादमध्ये ही 25 ठिकाणी छापा सत्र सुरू आहे. दारू धोरण घोटाळ्याप्रकरणी दिल्लीचे आरोग्यमंत्री सत्येंद्र जैन (Satyendra Jain) यांची आज ईडी चौकशी करणार आहे.

दारू धोरण घोटाळा प्रकरणी विशेष सीबीआय (CBI) न्यायाधीश गीतांजली गोयल (Geetanjali Goyal) यांनी गुरुवारी ईडीला सत्येंद्र जैन यांची चौकशी करण्याची परवानगी दिली होती. आता ED आज त्यांची चौकशी करणार आहे. न्यायालयानं ईडीच्या पथकाला तिहार तुरुंगातच चौकशी करण्यास सांगितलंय. जैन यांच्या चौकशीपूर्वीच ईडीकडून 40 ठिकाणी छापे टाकण्यात येत आहेत.

6 सप्टेंबरलाही ईडीनं दिल्ली, यूपी, पंजाबसह अनेक राज्यांतील दारू व्यापाऱ्यांच्या ठिकाणांवर छापे टाकले होते. गुरुग्राम, लखनौ, हैदराबाद, मुंबई, बंगळुरूसह सुमारे 35 ठिकाणी ही कारवाई करण्यात आली. दिल्लीतील दारू घोटाळ्याचं (Liquor Scam) राजकारण संपण्याचं नाव घेत नाहीय. सीबीआय तपासासोबतच भाजप उपमुख्यमंत्री मनीष सिसोदिया यांनाही सातत्यानं घेरण्याचा प्रयत्न करत आहे. मनीष सिसोदिया यांच्या घराबाहेर भाजप नेत्यांनी निदर्शनंही केली आहेत.