INDIA Alliance Mumbai Meeting : 2024 च्या लोकसभा निवडणुकीत भाजपला पराभूत करण्यासाठी राष्ट्रीय पातळीवर विरोधकांनी एकजूट केली आहे. या आघाडीला INDIA असं नाव देण्यात आलंय.

विरोधी पक्षांच्या नेत्यांची पहिली बैठक पाटणा व दुसरी बैठक बंगळुरूमध्ये पार पडल्यानंतर आता विरोधी आघाडीची पुढची बैठक मुंबईत होणार असल्याचं स्पष्ट झालंय. या बैठकीच्या तारखेत बदल झाल्याची माहिती समोर येत आहे.

त्यामुळं इंडिया आघाडीची (INDIA Alliance) मुंबईतील (Mumbai) बैठक लांबणीवर गेली आहे. आता इंडिया आघाडीची मुंबईतील बैठक 31 ऑगस्ट आणि 1 सप्टेंबरला होणार आहे. आधी ही बैठक 25 आणि 26 ऑगस्टला ठरली होती. मात्र, आता ही बैठक ऑगस्ट महिन्याच्या शेवटी होणार असल्याचं कळतंय. मुंबईतील हयात हॉटेल इथं ही बैठक पार पडणार आहे.

दरम्यान, 16 ऑगस्ट रोजी शरद पवार राज्यव्यापी दौऱ्यावर जाणार असल्याची माहिती आहे. त्यामुळं 25 आणि 26 ऑगस्ट रोजी शरद पवार मुंबईत उपलब्ध असू शकणार नाहीत, असं म्हटलं जात आहे. त्यामुळं विरोधी पक्षांची ही बैठक 31 ऑगस्ट आणि 1 सप्टेंबर रोजी होणार आहे. लोकसभा निवडणुकीत भाजपला आव्हान देण्यासाठी 26 पक्षांनी मिळून इंडिया आघाडीची स्थापना केली आहे.