नवी दिल्ली- जनरल उपेंद्र द्विवेदी यांची सरकारकडून नवे लष्कर प्रमुख म्हणून नियुक्ती केली जाणार आहे. जनरल मनोज सी पांडे यांचा ३० जून रोजी कार्यकाळ संपणार आहे. त्यानंतर लष्कराचे उपप्रमुख उपेंद्र द्विवेदी यांची या पदावर नियुक्ती करण्यात येईल. ३० जून रोजी ते या पदाचा पदभार स्वीकारतील. एएनआयने यासंदर्भातील माहिती दिली आहे.

उपेंद्र द्विवेदी हे २०२२ ते २०२४ मध्ये उधमपुरमधील नॉर्थ कमानचे जनरल ऑफिसर कमांडिंग-इन-चीफ (जीओसीसी-इ-सी) होते. मध्य प्रदेशच्या रीवा सैनिक स्कूलचे माजी विद्यार्थी असलेले लेफ्टिनेंट जनरल द्विवेदी यांना १९८४ मध्ये जम्मू आणि काश्मीर रायफल्सचे कमीशन देण्यात आले होते. त्यांनतर त्यांनी या यूनिटचे नेतृत्व केले. द्विवेदी यांना प्रदीर्घ अनुभव आहे.

नॉर्थ सैन्याचे कमांडर असताना जनरल द्विवेदी यांनी जम्मू आणि काश्मीरमध्ये दहशतवाद विरोधी अभियान सुरू केले होते. उत्तर आणि पश्चिमी सीमांवर विविध ऑपरेशन रावबणे आणि हे ऑपरेशन सुरू ठेवण्यासाठी महत्त्वाचे मार्गदर्शन करण्याचे काम त्यांनी केले आहे.

चीन लष्कराने गलवानमध्ये केलेल्या घुसखोरीनंतर सुरु झालेल्या चर्चांमध्ये जनरल द्विवेदी यांचा सक्रिय सहभाग होता. द्विवेदी यांचा यू. एस आर्मी वॉर कॉलेज, कार्लिंस्ले, यू.एस. ए.मध्ये नॅशनल डिफेंन्स कॉलेजमधील 'विशिष्ट फेलो' म्हणून त्यांचा सन्मान करण्यात आला आहे. त्यांच्याकडे सुरक्षा संदर्भातील अभ्यासक्रमातील एम. फिल आहे. याशिवाय सामरिक अभ्यास आणि सैन्य विज्ञानमधील दोन मास्टर डिग्री त्यांच्याकडे आहेत.

दरम्यान, लेफ्टिनेंट जनरल मनोज पांडे हे ३० एप्रिल २०२२ रोजी लष्कर सैन्य प्रमुख झाले होते. ते ३१ मे रोजी निवृत्त होणार होते, पण २६ मे २०२४ रोजी कॅबिनेटच्या नियुक्ती समितीने त्यांच्या कार्यकाळ १ महिन्यांनी वाढवला होता. त्यामुळे त्यांना ३० जून २०२४ पर्यंत वाढीव कार्यकाळ मिळाला होता. त्यामुळे महिन्याच्या शेवटी त्यांना कार्यमुक्त व्हावं लागेल.