पणजी: गोवा विधानसभेची निवडणूक अवघ्या काही दिवसांवर येऊन ठेपलेली आहे. या पार्श्वभूमीवर आता राजकीय वातावरण तापलं आहे. गोव्यात देखील काँग्रेस आणि शिवसेना हे दोन पक्ष एकत्र येण्याची शक्यता आहे. गोव्यातही आता महाविकास आघाडीचा प्रयोग होण्याची शक्यता आहे. या फक्त अफवा नसून याबाबत खुद्द शिवसेनेचे खासदार संजय राऊत यांनीच ट्विट करत खुलासा केला आहे.

संजय राऊत यांनी आज ट्विट करत म्हटलयं की, आज गोव्यात काँग्रेसच्या प्रमुख नेत्यांबरोबर आगामी विधानसभा निवडणुकी बाबत चर्चा झाली. दिनेश गुंडू राव, दिगंबर कामत आणि गिरीश चोडणकर तसेच माझे सहकारी जीवन कामत जितेश कामत उपस्थित होते. गोव्यात महाराष्ट्रा प्रमाणे महविकास आघाडीचा प्रयोग करता येईल का ? यावर चर्चा झाली, असं त्यांनी स्पष्ट केलंय.

दरम्यान गोव्यात आपली सत्ता टिकवून ठेवण्याच्या प्रयत्नात भाजप आहे. दुसरीकडे गोवा फॉरवर्ड पक्ष काँग्रेससोबत असून शिवसेनेला एकत्र घेऊन महाविकास आघाडीचा प्रयोग करण्याचं सुतोवाच संजय राऊत यांनी केलं आहे. दुसरीकडे गोव्यात प्रवेश करु पाहणाऱ्या तृणमूल काँग्रेस पक्षाने आता महाराष्ट्रवादी गोमंतक पक्षासोबत युती केली आहे. राज्यात निवडणुकांचे पडघम जोरात वाजत असून राजकीय वातावरणातील तणाव टीपेला पोहोचला आहे.