आपल्या देशात बलात्कारासारख्या घटना वारंवार घडताना दिसतात. अध्येमध्ये अशा एखाद्या घटनेवरुन मोठा गदारोळही माजतो आणि मग पुन्हा महिला सुरक्षेचा प्रश्न ऐरणीवर येतो. मात्र, आता अशी एक धक्कादायक बातमी समोर आलीय, जी ऐकून तुम्ही हैराण व्हाल. केरळ राज्यामध्ये चक्क एका बकरीवर बलात्कार करण्यात आल्याची धक्कादायक घटना घडली आहे. गेल्या मंगळवारी रात्री ही घटना घडली असून केरळमधील कासरगोड जिल्ह्यामध्ये एका विकृत नराधमाने तिच्यावर हे अत्याचार केले आहेत. विशेष म्हणजे ही बकरी गरोदर होती. तिच्यावर झालेल्या अत्याचारानंतर आरोपीने तिची हत्या देखील केली आहे.

ज्या नराधमाने हे कृत्य केलंय तो मूळचा तामिळनाडू राज्यातील एका हॉटेलचा कर्मचारी आहे. त्याची ओळख पटल्यानंतर त्याला आता अटकही करण्यात आली आहे. हॉटेल मालकाने त्याच्याविरोधात तक्रार केल्यानंतर पोलिसांनी या सेंथिल नावाच्या आरोपीला अटक केली आहे.

नेमकं काय घडलं?

ही सगळी घटना गेल्या मंगळवारच्या रात्री घडली असल्याची माहिती हॉटेल मालकाने दिली आहे. हॉटेलच्या कर्मचाऱ्यांना या बकरीच्या विव्हळण्याचा आवाज रात्री अकराच्या सुमारास येऊ लागला. तिच्या असह्य किंकाळ्यांच्या आवाजाने ते जागे झाले आणि घटनास्थळी आले. पाहतो तर त्यांना ही बकरी अत्यंत जखमी आणि रक्तबंबाळ अशा अवस्थेत आढळली. तेंव्हाच या कर्मचाऱ्यांना हा आरोपी घटना स्थळावरुन पळून जाताना दिसला. हा आरोपी गेल्या दोन वर्षांपासून त्या हॉटेलमध्येच काम करत होता.

बलात्कारीत बकरी हॉटेल मालकाची होती. तिला हॉटेलच्या मागील शेडमध्येच बांधण्यात आलं होतं. पोलिसांनी तक्रारीनंतर या घटनेची दखल घेत या आरोपीवर पशु क्रूरतेच्या कलमांखील गुन्हा दाखल केला आहे. तसेच हे कृत्य अनैसर्गिक असल्याचीही नोंद केली आहे. या क्रूर कृत्यामध्ये आणखी दोघे सहभागी असल्याचा आरोप हॉटेल मालकाने केला असून अद्याप एकालाच अटक करण्यात आली आहे. या बकरीचं शवविच्छेदनही करण्यात आलं असून शासकीय पशुवैद्यकीय शल्यचिकित्सकांच्या प्राथमिक अहवालामध्ये या बकरीवर बलात्कार झाला असल्याची माहिती मिळाली आहे. मात्र, तिचा मृत्यू या अत्याचारांमुळे झाला की नंतर तिला मारण्यात आलं, हे सविस्तर अहवालानंतर स्पष्ट होईल, असं सांगण्यात आलं आहे.