नवी दिल्ली : ‘भारतात २५ जून रोजी आणीबाणी लागू करण्यात आली होती. हा भारताच्या इतिहासातील काळा कालखंड होता,’ असे सांगत पंतप्रधान नरेंद्र मोदी यांनी काँग्रेसवर अप्रत्यक्षपणे टीका केली. दर महिन्याच्या अखेरच्या रविवारी प्रसारित होणारा ‘मन की बात’हा आकाशवाणीवरील कार्यक्रम मोदींच्या अमेरिका दौऱ्यामुळे एक आठवडा आधी प्रसारित करण्यात आला.

जनतेशी संवाद साधताना पंतप्रधान मोदी यांनी आणीबाणीचा उल्लेख केला. ते म्हणाले,‘‘ भारताच्या इतिहासातील हा एक काळा कालखंड होता. लाखो लोकांनी संपूर्ण शक्तीनिशी आणीबाणीचा विरोध केला. लोकशाहीच्या समर्थकांवर त्या काळात झालेल्या अत्याचारांबद्दल आठवून आजही मनाचा थरकाप उडतो. त्या अत्याचारांची माहिती असलेली पुस्तकेही प्रसिद्ध झाली आहेत. ’’

गुजरातच्या किनाऱ्याला धडकलेल्या बिपोरजॉय चक्रीवादळाचा उल्लेख करत मोदींनी, या वादळाचा हिमतीने सामना केल्याबद्दल कच्छमधील नागरिकांचे कौतुक केले. जलसंवर्धनासाठी आणि नैसर्गिक स्रोतांच्या रक्षणासाठी झालेल्या प्रयत्नांची काही उदाहरणे देताना पंतप्रधानांनी नगर जिल्ह्यातील निळवंडे धरणाचाही उल्लेख केला.

या धरणाच्या कालव्याचे काम पूर्ण होत असून काही दिवसांपूर्वीच पाणी सोडण्याची चाचणी झाल्याचे त्यांनी सांगितले. दरम्यान व्यवस्थापनाबद्दल त्यांनी छत्रपती शिवाजी महाराजांचेही स्मरण केले. ते म्हणाले,‘‘छत्रपती शिवाजी महाराजांची शासनपद्धती आणि व्यवस्थापन कौशल्यातून खूप काही शिकण्यासारखे आहे. महाराजांनी जलव्यवस्थापन आणि नौदलाबाबत केलेले कार्य भारतीय इतिहासाचा गौरव वाढविणारे आहे.