सोलन (पीटीआय): सौंदर्यप्रसाधने आणि अत्तर तयार करणाऱ्या अरोमा कारखान्याला शुक्रवारी भीषण आग लागली. आगीची तीव्रता भयावह असल्याने १८ तासानंतरही अग्निशमन दलाच्या जवानांना इमारतीत प्रवेश करता आला नाही. रात्री उशिरापर्यंत आग आटोक्यात आली नव्हती. या दुर्घटनेत १३ जण बेपत्ता असून ४१ जणांना सुरक्षितपणे बाहेर काढण्यात यश आले आहे.

कारखान्यातील आगीत ३३ जण जखमी झाले आहेत. आगीपासून बचाव करण्यासाठी ३३ जणांनी इमारतीवरून उड्या मारल्या आणि त्यामुळे ते जखमी झाले. त्याचवेळी २० कर्मचारी सुरक्षित असल्याचे पोलिसांनी सांगितले. धुराचे लोट आणि आगीच्या झळांपासून वाचण्यासाठी कर्मचारी इमारतीच्या गच्चीवर गेले आणि सैरावैरा पळू लागले. चारमजली असलेल्या इमारतीवरून काहींनी उड्या मारल्या.

अग्निशमन दलाच्या कर्मचाऱ्यांनी रात्रीपर्यंत ९० टक्के आग नियंत्रणात आणली. मात्र उष्णता आणि भिंत ढासळण्याच्या भीतीने पथकाला इमारतीत जाता आले नाही. या घटनेची माहिती कळताच पोलिस महासंचालक संजय कुंडू यांच्यासह सोलन जिल्ह्याचे अधिकारी घटनास्थळी दाखल झाले. या उद्योगाच्या व्यवस्थापकाला तसेच कामगार देणाऱ्या कंत्राटदारांना ठाण्यात पाचारण करण्यात आले आहे. आगीची घटना घडली तेव्हा इमारतीत १०० कर्मचारी होते आणि त्यातील बहुतांश महिला होत्या. आगीचे कारण समजू शकले नाही. उद्योगात रासायनिक पदार्थांचा साठा असल्याने अनेक स्फोट झाले.