नवी दिल्ली : सोमवारपासून संसदेचं पावसाळी अधिवेशन (Monsoon Session) सुरू झालंय. अधिवेशन सुरू होऊन दोन दिवस झाले असून विरोधकांनी सरकारला कोंडीत पकडण्याचा प्रयत्न केलाय. पावसाळी अधिवेशनाच्या पहिल्याच दिवशी विरोधी पक्षांनी अग्निपथ योजना, महागाई आणि असंसदीय शब्दांची यादी यावरुन सरकारला घेरण्याचा प्रयत्न केलाय. दरम्यान, स्मृती इराणी यांनी संसदेतील अनुपस्थितीवरून राहुल गांधींना चांगलंच झापलंय.

अधिवेशन सुरू होण्यापूर्वी सरकारनं बोलावलेल्या सर्वपक्षीय बैठकीव्यतिरिक्त, अधिवेशनाची रणनीती ठरवण्यासाठी विरोधी पक्षांच्या नेत्यांची राष्ट्रवादी काँग्रेसचे अध्यक्ष शरद पवार (Sharad Pawar) यांच्या निवासस्थानी बैठक झाली. त्याचवेळी संसदीय कामकाज मंत्री प्रल्हाद जोशी यांनी पत्रकारांशी संवाद साधताना सांगितलं की, संसदेच्या या अधिवेशनात विविध विभागांकडून 32 विधेयकं मांडण्याचे संकेत दिले आहेत, त्यापैकी 14 विधेयकं तयार आहेत. मात्र, आम्ही चर्चेशिवाय विधेयक मंजूर करणार नाही, असं त्यांनी स्पष्ट केलंय.

मंगळवारी विरोधी पक्षांच्या गदारोळामुळं लोकसभा आणि राज्यसभेचं कामकाज बुधवारी सकाळपर्यंत तहकूब करण्यात आलं होतं. आज पुन्हा अधिवेशन सुरु झालंय. सभागृहाच्या दुसऱ्या दिवसाचं कामकाज सुरू होण्यापूर्वी विरोधी पक्षांनी संसदेबाहेर निदर्शनं केली. या निदर्शनात काँग्रेस नेते राहुल गांधीही (Rahul Gandhi) सहभागी झाले होते. याच पार्श्वभूमीवर अधिवेशनादरम्यान, भाजपच्या महिला नेत्या आणि केंद्रीय मंत्री स्मृती इराणी (Smriti Irani) यांनी राहुल गांधींना चांगलंच सुनावलंय. इराणी म्हणाल्या, राहुल गांधी यांनी संसदेत कधीही प्रश्न विचारला नाही. नेहमीच संसदीय कामकाजाचा त्यांनी अपमान केलाय. त्यांची संसदेत उपस्थिती 40 टक्के पेक्षा कमी आहे. या व्यक्तीला संसदेत कोणतीही चर्चा नकोय, त्यासाठी स्वत:ला वाहून घेत आहेत, असा आरोप करत इराणींनी गांधींना चांगलंच झापलं.