Congress President Election 2022 : काँग्रेस निवडणूक समितीचे अध्यक्ष मधुसूदन मिस्त्री (Madhusudan Mistry) यांनी पक्षाच्या अध्यक्षपदासाठी गुरूवारी अधिसूचना जारी केली. त्यानुसार, उमेदवारी दाखल करण्याची प्रक्रिया 24 ते 30 सप्टेंबरपर्यंत चालेल. त्यात एकाहून अधिक नेत्यांनी उमेदवारी दाखल केली, तर 17 ऑक्टोबर रोजी निवडणूक होईल. तर 19 ऑक्टोबर रोजी निकाल घोषित होईल.

विद्यमान स्थिती पाहता अध्यक्षपदासाठी काँग्रेस खासदार शशी थरूर व राजस्थानचे मुख्यमंत्री अशोक गहलोत (Ashok Gehlot) यांच्यात थेट लढत होण्याची शक्यता आहे. मिस्त्रींनी पक्षातील सर्वच कार्यकर्त्यांना निवडवणूक लढवण्याचा अधिकार असल्याचं स्पष्ट केलंय. दरम्यान, आता मनीष तिवारी (MP Manish Tiwari) यांचंही नाव अध्यक्षपदाच्या शर्यतीत आलं आहे. काँग्रेसचे खासदार मनीष तिवारी यावेळी अध्यक्षपदासाठी निवडणूक लढवण्याची पूर्ण तयारी करत असल्याचं कळतंय.

खासदार तिवारीही पक्षाध्यक्षपदाची निवडणूक लढवण्याच्या तयारीत आहेत. तिवारी 24 सप्टेंबरला रात्री दिल्लीत पोहोचणार असल्याचं सांगण्यात येत आहे. त्यानंतर ते यासंदर्भात आपल्या समर्थकांशी चर्चा करून निवडणूक लढविण्याबाबत निर्णय घेतील. मनीष तिवारी हे एनएसयूआयचे 5 वर्षे आणि युवक काँग्रेसचे 2 वर्षे अध्यक्षही राहिले आहेत.

महत्त्वाची गोष्ट म्हणजे, तिवारी G-23 गटातही सहभागी झाले आहेत. याशिवाय, काँग्रेसचे ज्येष्ठ नेते आणि महाराष्ट्राचे माजी मुख्यमंत्री पृथ्वीराज चव्हाण (Prithviraj Chavan) यांचीही काँग्रेस अध्यक्षपदाच्या निवडणुकीत महत्वाची भूमिका असू शकते. त्यांच्या नावाची चर्चाही जोर धरू लागली आहे. येत्या तीन-चार दिवसांत अध्यक्षपदासाठी निवडणूक लढविण्याचा दावा करणारी आणखी अनेक नावं बाहेर येऊ शकतात, असं मानलं जात आहे. दरम्यान, नवीन अध्यक्षपदाच्या शर्यतीत काँग्रेसचे ज्येष्ठ नेते आणि राजस्थानचे मुख्यमंत्री अशोक गेहलोत यांच्या नावाचा विचार केला जात आहे. राहुल गांधी निवडणूक लढवणार की नाही याबाबत अजूनही संभ्रम आहे. मात्र, उमेदवारी प्रक्रियेदरम्यान 24 ते 30 या कालावधीत राहुल गांधी भारत जोडो यात्रेत राहणार असल्याचे पक्षाचे ज्येष्ठ नेते जयराम रमेश यांनी स्पष्ट केलं आहे.