दिल्ली : राहुल गांधी यांना सुप्रीम कोर्टाकडून दिलासा मिळाल्यानंतर त्यांना त्यांची गेलेली खासदारकी पुन्हा मिळाली आहे. लोकसभा सचिवालयाकडून त्यांना आता खासदारकी बहाल करण्यात आली असून उद्या मोदी आणि राहुल गांधी आमनेसामने येण्याची शक्यता नाकारता येत नाही. तर त्यांनी याआधी मार्केट यार्डमध्ये जाऊन कामगारांच्या आणि शेतकऱ्यांच्या समस्या जाणून घेतल्या आहेत.

राहुल गांधी यांनी आपल्या ट्वीटरवरून एक व्हिडिओ शेअर केला आहे. त्यामध्ये ते आझादपूर येथील मार्केट यार्डमध्ये गेले असून व्यापारी, मजूर, कामगार, शेतकऱ्यांची भेट घेतली.

"जटाशंकर हे येथे काम करणारे मजूर असून, या कामामुळे त्यांना एक वर्षापासून घरी जाता येत नाही. गेलात तरी काम चुकले तर पैसे कापले जातील आणि या महागाईत जगणे कठीण होऊन बसेल, त्यामुळे त्यांना आपल्या कुटुंबाला भेटता आलेलं नाही."

"या नुकसानीमुळे आठवड्यातून दोन ते तीन दिवस उपाशी झोपावे लागते" असेही एका दुकानदाराने सांगितले. देशातील गरिबांचे प्रश्न सोडवणे तर दूरच, सरकार त्यांचे ऐकूनही घेत नाही!

काळ बदलेल, भारत एक होईल, गरिबांचे अश्रू पुसले जातील."

असं ट्वीट राहुल गांधी यांनी आपल्या अधिकृत ट्वीटर हँडलवरून केलं असून यासंदर्भातील व्हिडिओ शेअर केला आहे.

दरम्यान, राहुल गांधी यांनी याआधी ट्रक ड्रायव्हर, शेतकरी महिला, भात लागवड करणारे शेतकरी यांच्या भेटी घेतल्या आहेत. तर हरियाणा येथील काही महिला शेतकरी गांधी कुटुंबियांना त्यांच्या दिल्लीतील घरी येऊन भेटल्या आहेत. त्यानंतर त्यांनी मार्केट यार्डमध्ये जाऊन तिथे काम करणाऱ्या नागरिकांचे प्रश्न जाणून घेतले. पूर्ण व्हिडिओ राहुल गांधी यांच्या युट्यूब चॅनेलवर पाहायला मिळेल.