पणजी - आगामी 14 फेब्रुवारी रोजी गोव्यामध्ये विधानसभेच्या 40 जागांसाठी मतदान होणार आहे. यासाठी अनेक पक्षांकडून विजयासाठी रणनिती आखण्यात येत आहे. दरम्यान, गोव्याच्या विधानसभेच्या निवडणुकांसाठी राष्ट्रवादी काँग्रेसपक्षातर्फे 24 स्टार प्रचारकांची यादी जाहीर करण्यात आली आहे. यामध्ये राष्ट्रवादीचे अध्यक्ष शरद पवार, प्रफुल्ल पटेल, सुप्रिया सुळे, महाराष्ट्राचे उपमुख्यमंत्री अजित पवार आणि इतर नेत्यांच्या नावांचा समावेश करण्यात आला आहे.

राष्ट्रवादीकडून जाहीर करण्यात आलेल्या स्टार प्रचारक यादीमध्ये सुनिल तटकरे, गृहमंत्री दिलीप वळसे पाटील, जयंत पाटील, जितेंद्र आव्हाड, नवाब मलिक, धनंजय मुंडे, हसन मुश्रीफ यांच्यासह अन्य नेत्यांचाही यामध्ये समावेश करण्यात आला आहे. गोव्यात 14 फेब्रुवारीला एकाच टप्प्यात मतदान होणार असून 10 मार्चला निकाल जाहीर होणार आहेत. गोव्यात विधानसभेच्या 40 जागा असून, सध्या येथे भाजपचे सरकार आहे. राज्यातील शेवटच्या विधानसभा निवडणुका फेब्रुवारी 2017 मध्ये झाल्या होत्या. यावेळी केवळ काँग्रेस आणि भाजपच नाही तर ममता बॅनर्जींची टीएमसी आणि अरविंद केजरीवाल यांची आम आदमी पक्ष निवडणुकानंतर एकत्र येऊ शकतात अशी जोरदार चर्चा राजकीय वर्तुळात सध्या सुरू आहे.