नवी दिल्ली : राष्ट्रीय पक्ष बनण्यासाठी महाराष्ट्राबाहेर विधानसभा निवडणुका लढविण्याची तयारी करणाऱ्या राष्ट्रवादी कॉँग्रेस पक्षाने जम्मू-काश्मीर विधानसभा निवडणुकीसाठी २६ स्टार प्रचारकांची यादी जाहीर केली आहे. पक्षाध्यक्ष अजित पवार, मंत्री छगन भुजबळ यांच्यासह पार्थ पवार हे देखील स्टार प्रचारक म्हणून जम्मू-काश्मीरमध्ये प्रचार करतील.

केंद्रशासित प्रदेश जम्मू काश्मीर विधानसभेच्या ९० जागांसाठी तीन टप्प्यात निवडणूक आहे. जम्मू काश्मीरमध्ये जवळपास २५ जागा लढण्याचे नियोजनही राष्ट्रवादी कॉँग्रेसने केले आहे. त्यापार्श्वभूमीवर पक्षाचे सरचिटणीस एस. आर. कोहली यांनी २६ स्टार प्रचारकांची यादी निवडणूक आयोगाला काल (ता. २२) सादर केली.

यामध्ये पक्षाध्यक्ष अजित पवार, कार्यकारी अध्यक्ष व राज्यसभा खासदार प्रफुल्ल पटेल, केंद्रीय सरचिटणीस आणि प्रांताध्यक्ष सुनील तटकरे, राज्यातील मंत्री छगन भुजबळ, सरचिटणीस एस. आर. कोहली, जम्मू काश्मीरचे प्रभारी ब्रीजमोहन श्रीवास्तव, कार्यसमितीचे सदस्य पार्थ पवार, ओबीसी सेलचे प्रमुख उमाशंकर यादव बहुतांश जम्मू काश्मीरमधील स्थानिक नेत्यांचा समावेश आहे.