नवी दिल्ली : राष्ट्रवादीत बंडाळी झाल्यानंतर यामध्ये सहभागी असलेल्या पदाधिकाऱ्यांवर कारवाईचा धडाका पक्षाध्यक्ष शरद पवार यांनी सुरु केला आहे. यामध्ये राष्ट्रवादीचे कायम सचिव तसेच दिल्ली कार्यालयाचे सचिव एस. आर. कोहली यांची हाकालपट्टी करण्यात आली आहे. खुद्द शरद पवार यांनी ही कारवाई केली आहे. पक्षविरोधी कारवाया केल्याप्रकरणी ही कारवाई करण्यात आली आहे. (NCP Crisis Sharad Pawar ousts SR Kohli in Delhi and Sonia Dhuhan oppointed)

पवारांनी आपल्या निवेदनात म्हटलं की, माझ्या निदर्शनास आलं आहे की राष्ट्रवादीचे स्थायी सचिव आणि दिल्ली कार्यालयाचे प्रभारी एस.आर. कोहली यांनी 2 जुलै 2023 रोजी मंत्रिपदाची शपथ घेतलेल्या प्रफुल्ल पटेल, अजित पवार आणि इतर ८ आमदारांच्या बाजूनं स्पष्टपणे पाठिंबा दर्शविला आहे. पक्षाच्या निर्देशाचं आणि आदेशाचं उल्लंघन आणि पक्षविरोधी कारवाया केल्या आहेत.

त्यामुळं तुम्ही राष्ट्रवादी काँग्रेस पक्षाच्या घटनेच्या कलम 32चं उल्लंघन करून आणि या घटनेच्या कलम 21(vi)(a) नुसार बनविलेल्या नियमांनुसार स्पष्ट आणि निरपेक्षपणे पक्षविरोधी कारवाया केल्या आहेत. तुम्ही स्वेच्छेनं सदस्यत्व गमावण्यासारखी कृती केली असून मी अधिकृतरित्या तुमचं नाव पक्षाच्या सदस्यत्व नोंदणीतून काढून टाकत आहे. तुम्ही 9 आमदारांच्या पक्षांतरांची सोय आणि प्रयत्न करत होतात. महाराष्ट्र विधानसभेच्या आमदारांनी छुप्या पद्धतीनं मदत करत होतात. त्यामुळं प्राथमिक सदस्यत्वातून तुम्ही अपात्रतेला आमंत्रित केलं आहे.

सोनिया धुहन यांची नियुक्ती

कोहली यांच्या हाकालपट्टीनंतर सोनिया धुहन यांची राष्ट्रवादीच्या दिल्ली मध्यवर्ती कार्यालयाच्या इनचार्जपदी नियुक्ती केली आहे. शरद पवार यांनी स्वतः ही नियुक्ती केली आहे.