नवी दिल्ली - देशाला संसदेची नवी इमारत मिळाली आहे. 19 सप्टेंबर रोजी सर्व खासदार नवीन इमारतीत दाखल झाले. त्यानंतर महिला आरक्षण विधेयक मांडण्यात आले. विधेयकाच्या श्रेयवादावरून नव्या संसद भवनातील राजकीय वातावरणही तापले होते. मात्र तेथे बसवण्यात आलेल्या शक्तिशाली एसींमुळे (एअर कंडिशन्स) खासदार थंडीने गारठल्याचं चित्र आहे.

एसीच्या कमी केलेल्या तापमानामुळे काही खासदारांची प्रकृती ढासळल्याचं सांगण्यात येत आहे. एबीपी न्यूजने दिलेल्या वृत्तानुसार, थंडीमुळे काँग्रेस नेते अखिलेश प्रसाद सिंह यांची प्रकृती खालावली होती. त्याच्या हातात औषधाचे पाकीटही दिसले.

अखिलेश यांनी सांगितले होते की, नवीन संसदेतील एसी खूप शक्तीशाली आहे. त्यामुळे अर्धा डझनहून अधिक खासदारांची प्रकृती खालावली आहे. काँग्रेस नेत्या सोनिया गांधी यांनाही थंडीमुळे त्रास झाल्याचे सांगण्यात आले. याच कारणामुळे लोकसभेत महिला आरक्षण विधेयकावर मतदान होणार होते, तेव्हा त्या उपस्थित नव्हत्या.

सध्या याबाबत सभापतींकडे तक्रार करण्यात आली आहे. तसेच थंडीबाबत काही कार्यवाही करण्यास सांगितले आहे. यावर सरकारकडून कोणतीही प्रतिक्रिया देण्यात आलेली नसून, नवीन संसद भवनातील एसी जास्त प्रमाणात थंड होत असून त्यामुळे खासदारांच्या आरोग्यावर परिणाम होत असल्याचे सांगण्यात येत आहे.